Kigali: Imodoka zitwara abagenzi zigiye kujya zihagurukira ku isaha

Urwego ngenzuramikorere rw’igihugu (RURA) rugiye kuvugurura ibikorwa byo gutwara abagenzi mu Mujyi wa Kigali, umugenzi akajya gutega azi neza igihe imodoka ihagurukira.

RURA yabitangaje mu kiganiro yagiranye n’abanyamakuru kuri uyu wa kane, kigamije kwereka Abanyarwanda aho urwego rwo gutwara abagenzi rwavuye, aho rugeze n’icyerekezo cyarwo.

Iyo gahunda nshya izatangira muri 2020, ndetse RURA ifite icyizere ko izashoboka kuko hari gahunda yo kongera umubare w’amabisi manini kandi afite n’aho abafite ubumuga banyuza amagare yabo bayariho.

RURA iranateganya gutanga gahunda y’ingendo, buri muntu akaba ayifite ku rupapuro cyangwa muri telephone kandi bisi zikazahabwa uburyo bwihariye bwo gutwara abantu zidahuye n’uruvunganzoka rw’izindi modoka (traffic jam cyangwa ambouteillage).

Kongera imodoka nini zitwara abagenzi bizajyana no kongera ibigo by’ubwikorezi, ipiganwa kuri iri soko rikazaba mu mwaka utaha ku bashoramari babyifuza.

Umva inkuru irambuye hano: