COVID19: U Rwanda rugiye guhagarika ingendo z’indege mu rwego rwo gukumira coronavirus

Ministre w’Ubuzima Dr Ngamije Daniel, yatangaje ko ingendo zo mu kirere zigiye guhagarikwa mu gihe cy’iminsi 30 ishobora kongerwa mu rwego rwo kugabanya ikwirakwizwa ry’icyorezo cya COVID-19.

Uyu mwanzuro uzatangira gushyirwa mu bikorwa mu ijoro ryo ku wa gatanu tariki ya 20 werurwe 2020.

Hazahagarikwa ingendo z’indege ziva cyangwa ziza mu Rwanda, harimo n’iza RwandAir, zinyuze ku Kibuga Mpuzamahanga cya Kigali.

Hagati aho ariko indege zitwara imizigo n’izikora ibikorwa by’ubutabazi zizakomeza gukora.

Ministre w’Ubuzima yatangaje ibi kuwa gatatu tariki 18 Werurwe, nyuma y’uko abarwayi ba COVID-19 mu Rwanda bamaze kumenyekana ari 11.

Batatu bashya bagaragaye barimo Umuhindekazi w’imyaka 37 wageze mu Rwanda ku itariki ya 8 Werurwe 2020 aturutse mu mujyi wa Mumbai mu Buhinde, akaba yarashakanye n’umwe mu baherutse kugaragaraho Coronavirus mu Rwanda.

Harimo n’umunyarwanda w’imyaka 26 udaherutse kugirira ingendo mu mahanga, mu gihe uwa gatatu ari umunyarwanda w’imyaka 45 wageze mu Rwanda ku itariki ya 16 Werurwe 2020 avuye mu Bubiligi anyuze Addis Ababa muri Etiyopiya.

Ministre w’ubuzima avuga ko ingendo z’indege ari imwe mu nzira zirimo kwihutisha ikwirakwira rya COVID-19 kuko benshi u Rwanda rwakiriye bagaragayeho iki cyorezo baje bavuye hanze.

Minisitiri w’Ubuzima yatangaje ko hari ihumure mu gukumira iki cyorezo mu gihe abantu bubahirije amabwiriza yatanzwe mu kwirinda, asaba abantu kudatinya gutanga amakuru igihe baba barahuye n’umuntu wagaragayeho ibimenyetso bya COVID-19.