Kenya: Ibikoresho bya miliyoni ebyiri z’amadolari byo kurwanya Covid-19 byaburiwe irengero

Muri Kenya, inzego z’iperereza zirimo gushakisha irengero ry’amamiliyoni yahawe icyo gihugu mu rugamba rwo guhangana na covid-19.

Inkuru dukesha BBC iravuga ko bishoboka ko amamiliyoni y’amadolari ndetse n’ibikoresho byari bigenewe kurwanya coronavirus byibwe. Ni mu gihe umubare w’abandura aho muri kenya ukomeje kuzamuka.

Iperereza ritangiye nyuma y’uko ikinyamakuru cy’aho muri kenya gitangaje ko ibikoresho bifite agaciro ka miliyoni ebyiri z’amadolari byari byatanzwe n’ubushinwa byaburiwe irengero.

Kenya ikaba imaze kubona inkunga zatanzwe n’umuherwe w’umushinwa Jack Ma, Ikigega Mpuzamahanga cy’Imari (IMF), ndetse n’ibihugu byo ku mugabane w’uburayi. Ariko guverinoma y’icyo gihugu ikomeje kubazwa uko yakoresheje iyo nkunga, dore ko abakozi bo mu nzego z’ubuzima bavuga ko badafite ibikoresho bihagije bibarinda kwandura.

Kugeza ubu aho muri kenya habarurwa abantu 3,727 bamaze kwandura coronavirus. 104 bamaze guhitanwa nayo

BBC