USA zikubiye isoko ry’umuti wa Remdesivir ufite ubushobozi bwo guhangana na Covid-19

Leta Zunze Ubumwe za Amerika zamaze kugura ingano yose yari ku isoko y’umuti ukoreshwa mu kuvura icyorezo cya Covid-19 uzwi nka ‘Remdesivir’, ibintu bizatuma ibindi bihugu byugarijwe na Coronavirus bitabasha kuwubona nibura mu gihe cy’amezi atatu.

Aya makuru yasotse mu itangazo ry’Ishami rya Amerika rishinzwe Ubuzima, avuga ko iki gihugu cyamaze kugura 100% by’ingano uruganda rukora uyu muti ruzakora muri Nyakanga ndetse na 90% by’uwo ruzakora muri Kanama na Nzeri.

Umuyobozi w’iri shami rishinzwe ubuzima muri Amerika Alex Azar yashimiye ’Perezida Trump wabashije kugera kuri iki gikorwa kugira ngo Abanyamerika babone umuti wa mbere wemewe mu buvuzi bwa Covid-19.’

Nubwo hari imiti myinshi yifashishwa mu kuvura Coronavirus uyu muti wa Remdesivir niwo wonyine wemejwe n’Ikigo gishinzwe kugenzura ibiribwa n’imiti muri Amerika ko wakoreshwa mu kuvura covid-19.

Nyuma yo kumenya ibijyanye n’iki gikorwa ku wa 2 Nyakanga, Ishami ry’Umuryango w’Abibumbye ryita ku buzima,WHO ryatangaje ko riri kubikurikirana, kugira ngo hagenzurwe koko niba Amerika yakoze iki gikorwa cyo kwikubira.

Mu gihe iyi gahunda ya Leta Zunze Ubumwe za Amerika yaba ishyizwe mu bikorwa ibihugu by’i Burayi nabyo bisanzwe byifashisha uyu muti mu kuvura covid-19 ntibizongera kuwubona mu gihe cy’amezi atatu.