Bill Gates yanenze uburyo USA itita ku kurwanya Covid-19

Umuherwe Bill Gates yavuze ko uburyo Leta Zunze Ubumwe za Amerika zitita ku kurwanya icyorezo cya Coronavirus biteye agahinda, ndetse ko kujenjekera iki icyorezo ubwabyo bishobora kugira ingaruka zikomeye mu gihe cyaba gikomeje gukwirakwira cyane.

AVuga ko ibi abishingira ku kuba Amerika ititaye kuri iki cyorezo, kubera ko yongera gufungura ibikorwa mu gihe ubwandu bukomeje kwiyongera.

Gates akomeza avuga ko ingamba zafashwe mu kurwanya iki cyorezo zidahagije, kubwe, akaba abona ari uko zahuriranye n’igihe cy’impeshyi ubusanzwe gifasha mu kudakwirakwira kw’agakoko, ariko nyuma y’umwaka ngo nibwo ingaruka zishobora kuzagaragara kurushaho.

Bill Gates n’umugore we Melinda bamaze gutanga asaga miliyoni 350 z’amadorari ya Amerika mu rugamba rwo guhangana na Coronavirus binyuze mu muryango bashinze bise Bill & Melinda Gates Foundation.

Kugeza ubu Leta Zunze Ubumwe za Amerika ziyoboye ibindi bihugu ku Isi mu kugira ubwandu bwinshi n’abanduye miliyoni 4.5. mu gihe abamaze gupfa bo bagera ku bihumbi 153.