Abakuru bo mu ishyaka ry’abarepubulikani rya Perezida Donald Trump banze igitekerezo cye cyuko amatora ya perezida ateganyijwe kuba mu kwezi kwa cumi na kumwe uyu mwaka akwiye kwigizwa inyuma, kubera impungenge zuko ashobora kubamo uburiganya.
Mu butumwa yanyujije kuri Twitter ejo ku wa kane, Perezida Trump yavuze ko mu gihe bigaragara ko abantu benshi bashobora gutora bakoresheje uburyo bw’ikoranabuhanga, bishobora gutuma haba ubujura bw’amajwi n’inenge, kuburyo ibyazava mu matora byazaba bitizerwa. Ariyo mpamvu asaba ko aya matora yigizwayo kugeza igihe abaturage ba Amerika bazaba bashobora gutora neza kandi batekanye.
Ntibiramenyekana niba iki gitekerezo cya Trump gishyigikiwe, ariko kenshi yagiye arwanya amatora yakwifashisha ikoranabuhanga, aho avuga ko umuntu umwe ashobora gutora inshuro nyinshi.
Gusa mu Itegeko Nshinga rya Leta Zunze Ubumwe za Amerika, Trump ntabwo afite ububasha bwo gusubika amatora ku giti cye, icyemezo cyafatwa byasaba ko cyemezwa n’Inteko Ishinga Amategeko, bikaba bishobora kugorana mu mutwe w’abadepite wiganjemo aba-démocrate.
Ni mugihe Intara zitari nke za Amerika zifuza korohereza abantu mu gutora bakoresheje uburyo bwa Email ndetse n’iposita hagamijwe kwirinda ikwirakwira rya coronavirus.
Post comments (0)