Afrika y’epfo: Umugabo ukekwaho kwica abagore yiyahuriye mu munyururu

Minisitiri ushinzwe polisi muri Afurika y’Epfo yatangaje ko umugabo wiyahuriye muri kasho ya polisi yari yemeye ko yishe abagore benshi mu cyaro cyo mu ntara ya KwaZulu-Natal.

Amagana y’abantu ejo ku wa mbere yagiye imbere y’urukiko yamagana ubwicanyi bwakorewe abagore batanu, bashaka no kureba abagabo babiri bafashwe bakekwaho ubwo bwicanyi

Imibiri y’abo bagore bishwe hagati ya Mata na Kanama yatoraguwe mu murima w’ibisheke, hari abandi bagore bataramenyekana neza umubare baburiwe irengero.

Abantu barakajwe no kubwirwa ko umwe mu bakekwa yiyahuriye muri kasho ya polisi. Bamwe basaba ko berekwa umurambo we kugira ngo babyemere.

Minisitiri Bheki Cele yatangarije imbaga y’abigaragambyaga ko uwiyahuye yari yabanje kwemera icyaha, naho mugenzi we bafunganye ko yakubiswe bikomeye n’abafungwa bandi yasanze muri kasho. Ministri Cele kandi yabwiye abigaragambya ko bishoboka ko hari indi mibiri y’abagore itaraboneka.

Uyu bavuga ko yiyahuye, yagombaga kugezwa imbere y’urukiko ejo ku wa mbere.

Abatuye agace aba bagore biciwemo bavuga ko babaho mu bwoba kuko nta polisi iba hafi ngo ibacungire umutekano.

Ubwicanyi bwakorewe abo bagore bwari bwarateye urujijo n’ubwoba kuko ababicaga batazwi, bamwe bavugaga ko ari umwicanyi kabuhariwe cyangwa itsinda ry’abicanyi ribikora.