Namibia: Hari abarikuvurisha covid19 amase y’inzovu

Abanyanamibiya baburiwe ingaruka zo gukoresha amase y’inzovu nk’uburyo bwo kwivura covid19.

Ni mu gihe kuri uyu wa gatatu taliki 19 Kanama 2020, Ministiri w’ubuzima wa Namibia Kalumbi Shangula yatangaje ko amase y’inzovu atari umuti uvura covid19.

Abavuzi gakondo bo muri iki gihugu bavuga ko ubusanzwe amase y’inzovu atunganywa, agashyirwa mu bushyuhe bwinshi, ubundi agashyirwa mu kintu kiza abantu bakayahumeka akabakiza ibicurane, umutwe ndetse n’imyunda.

Naho abavuzi ba kizungu bo bavuga ko ubwo buryo siyansi ya kivuzi itabushishikariza abantu kuko ubuziranenge bwayo butazwi.

Ministri Shangula akaba yaratangarije ibiro ntaramakuru by’abafaransa AFP ko batewe impungege n’abavuzi gakondo bari kuvurisha abaturage uwo muti ukozwe mu mase y’inzovu baguga ko ukiza coronavirusi.

Ikindi ni uko hari abashobora gutuma abaturage bimaraho amafaranga bagura uwo muti kandi mu by’ukuri ntawuzi ubushobozi bwawo mu gukiza coronavirusi.

Iki gihugu giherere muri afrika y’amajyepfo kimaze kugaragaramo abantu ibihumbi 4,464 bamaze kwandura naho 37 nibo bamaze guhitanwa n’iki cyorezo.