Ababyeyi barashishikarizwa kudatuma abana mu isoko kuko bibaviramo uburara

Ababyeyi bo mu Karere ka Nyaruguru barashishikarizwa kureka  gutuma abana mu isoko kuko usanga akenshi bibaviramo uburara.

Ababyeyi barema isoko mu Gasantere ka Karamirabagenzi mu Murenge wa Muganza bahawe ubu butumwa nyuma y’igikorwa cyafatiwemo abana 59 bari baje batwaje ababyeyi ibicuruzwa.

Ababyeyi bari baremye isoko rya Kamirabagenzi, aho bari kumwe n’abana bari begeranyijwe ngo baganirizwe, babwiwe ko gutuma abana ku isoko bibaviramo uburara kuko batangira kujyayo batumwe n’ababyeyi, hanyuma bakazagera aho bajyayo bibwirije, bikazagera n’aho batacyumva ababyeyi bababuza kuzerera.

Ababyeyi banasabwe gutoza abana imirimo itabavuna, urugero nko kujya kuvoma, kwahira, gutashya, kugira ngo bazavemo abana bazi gukora, kuko no kutabaha ibyo bakora bijya bibaviramo kurarikira kuzerera, bakazavamo imburamukoro.

Ubu bukangurambaga bwatangirijwe mu Gasantere ka Karamirabagenzi buzakomeza ku masoko yose yo muri aka Karere, ari nako hafatwa abana baremye isoko bakaganirizwa hamwe n’ababyeyi babo,  kuzageza ubwo ababyeyi bazumva ko n’ubwo abana batajya kwiga kubera Coronavirus, badakwiye no kurema amasoko byabaviramo uburara no kuba bahandurira iyi ndwara itagira umuti ntinagire urukingo.

Umva inkuru irambuye hano: