Minisitiri Ngirente yagaragaje inzitizi zibangamiye isoko rusange rya EAC

Minisitiri w’intebe Edouard Ngirente, yavuze ko ubushake bwa politiki, no gukuraho inzitizi zose muri serivisi zitwara abantu mu kirere harimo gufungurirana ikirere, ari cyo gisubizo cyoroshye kugirango Umuryango w’Afurika y’Iburasirazuba (EAC) ubashe kugera ku ntego z’isoko rusange.

Ngirente, ibi yabigarutseho ku wa Kane tariki 21 Nyakanga 2022, i Arusha muri Tanzania mu mwiherero wo ku rwego rwo hejuru wahuje abakuru b’ibihugu bya EAC, kugira ngo baganire ku masezerano y’isoko rusange ry’uyu muryango, East African Common Market protocol.

Uyu mwiherero witabiriwe n’Abakuru b’ibihugu na Guverinoma barimo Perezida wa Tanzania Samia Suluhu Hassan, Pwerezida wa Uganda Yoweri Kaguta Museveni, Perezida w’u Burundi Evariste Ndayishimiye na Perezida wa Kenya Uhuru Kenyatta.

Perezida wa Somalia Hassan Sheikh Mohamud, yitabiriye uyu mwiherero nkumushyitsi wo gutanga umurongo ku isoko rusange.

Iri soko uyu munsi rihuriweho n’ibihugu birindwi, rikaba kandi inkingi ya kabiri ya gahunda yo kwishyira hamwe k’uyu muryango.

Ngirente yagize ati: “Ntabwo navuga ko iki kibazo cyoroshye ariko ndatanga igisubizo cyoroshye cyane. Tugomba gukuraho inzitizi zose zibangamiye serivisi z’ubwikorezo bwo mu kirere.

Ati: “Hariho umwanzuro wafashwe hashize imyaka irenga 10; umwanzuro w’amasezerano ya Yammossoukro. Turamutse dufashe ayo masezerano tugatangira kuyashyira mu bikorwa mu muryango w’Afurika y’Iburasirazuba, ndatekereza ko ibyo bizoroshya ibijyanye no gutwara abantu n’ibintu.”

Amasezerano ya Yamoussoukro, mu bijyanye no gufungurirana ikirere hagati y’ibihugu bya Afurika, yemejwe n’Abaminisitiri bashinzwe indege za gisivili, mu 1999, maze yitirirwa uyu umujyi wa Côte d’Ivoire.

Mu 2000, Aya masezerano yemejwe n’abakuru n’ibihugu bya Afurika ndetse yatangiye gukurikizwa mu 2002 ariko ishyirwa mu bikorwa ryayo ntago ryagenze nk’uko bikwiye.

Aba bakuru b’ibihugu bongeye gushimangira gushyira mu bikorwa amasezerano ashyiraho isoko rusange.

Uyu mwiherero wayobowe na Perezida wa Kenya Uhuru Kenyatta, nk’Umuyobozi w’umuryango wa Afurika y’Iburasirazuba, yavuze ko isoko rusange ari bwo buryo bwiza bwo kuzamura ubucuruzi n’ubukungu mu karere. Nk’uko inkuru ya The New Times ibitangaza.

Perezida Kenyatta yakomeje avuga ko iterambere ry’ibikorwa remezo ari ingenzi mu kugera ku ntego y’akarere ko kuba isoko rimwe rinini riva ku nyanja y’Abahinde kugera ku nyanja ya Atalantika.

Yavuze ko Afurika y’Iburasirazuba izagera ku Isoko Rusange ari uko abaturage bayo nibashobora gufashwa koroherezwa ku bijyanye n’urujya n’uruza rw’abantu n’ibicuruzwa.

Perezida wa Uganda, Yoweri Museveni, we yavuze ko intego zo guteza imbere akarere bitagerwaho mu gihe isoko rusange gahuriyeho ridashyizwe mu bikorwa.

Perezida w’u Burundi, Evariste Ndayishimiye yatanze urugero rwo kuba Umuryango w’ubukungu w’ibihugu byo muri Afurika yo hagati (ECCAS) u Burundi busanzwe bubereye umunyamuryango utaragera ku ntego zo kwihuza kubera kubura ubufatanye mu iterambere ry’ibikorwa remezo.

Kuri uyu wa 5, bwo hari inama isanzwe ya 22 y’abakuru b’ibihugu baganira ku gushimangira ukwishyira hamwe no kwagura ubutwererane mu muryango wa Afurika y’Iburasirazuba.