OMS yemeje ko Monkeypox ari indwara ihangayikishije Isi

Umuryango w’Abibumbye, Ishami ryawo ryita ku Buzima, ryatangaje ko indwara ya monkeypox ari ikibazo gihangayikishije Isi. Ni mu mwanzuro wafashwe ubwo hasozwaga inama ya kabiri ya komite idasanzwe ya OMS kuri virusi.

Mu kiganiro n’abanyamakuru, Umuyobozi mukuru wa OMS, Dr Tedros Adhanom Ghebreyesus yatangaje ko ubu abantu barenga 16 000 bagaragaye mu bihugu 75.

Yavuze ko abamaze gupfa kugeza ubu bitewe n’iki cyorezo bagera ku abantu batanu.

Dr Tedros yavuze ko komite ishinzwe ubutabazi itashoboye kumvikana ku kumenya niba icyorezo cya monkeypox kigomba gushyirwa mu byorezo bihangayikishije cyane ku isi, gusa yavuze ko iki cyorezo cyakwirakwiriye ku isi byihuse kandi ko yahisemo ko koko gihangayikishije amahanga.

Sky News yatangaje ko iyi mpuruza yatanzwe na OMS hagamijwe gukangura amahanga kuri iki cyorezo, ndetse bikihutira gushaka inkunga no kwiga uko byagabana inkingo.

Monkeypox yiyongereye kurutonde ruriho COVID-19, Ebola, na Zika zatangajwe nk’indwara z’ibyorezo bihangayikishije ku isi.