Sunak na Truss bashyigikiye amasezerano yo kohereza abimukira mu Rwanda

Rishi Sunak na Liz Truss bakomeje guhatanira gusimbura Boris Johnson ku mwanya w’ubuyobozi bw’ishyaka riri ku butegetsi mu Bwongereza no ku mwanya wa Minisitiri w’Intebe, bagaragaje ko bashyigikiye amasezerano y’ubufatanye yo kohereza abasaba ubuhungiro n’abimukira mu Rwanda.

Aba bombi bashyigikiye ko amasezerano y’ubufatanye hagati y’u Bwongereza n’u Rwanda kubijyanye no kohereza abimukira n’abasaba ubuhungiro biteguye gushyigikira ko ashyirwa mu bikorwa.

Ikinyamakuru The Telegraph cyo mu Bwongereza, cyatangaje ko Rish Sunak yavuze ko azakora ibishoboka byose kugira ngo iyo gahunda yadindiye y’ubufatanye hagati y’u Rwanda n’u Bwongereza ishyirwe mu bikorwa.

Yavuze kandi ko u Bwongereza bwiteguye gukorana n’ibindi bihugu bifite ubushake mu guhangana n’ikibazo cy’abimukira.

Madamu Liz Truss, mu kiganiro yagiranye na daily mail kuri iki cyumweru, na we yavuze ko yiyemeje guharanira ko ubufatanye bw’u Bwongereza n’u Rwanda bushyirwa mu bikorwa, ndetse ko azongera umubare wabakozi bakora ku mupaka bakava ku 9000 bakagera ku 10,800.

Amasezerano y’u Rwanda n’u Bwongereza yerekeranye n’abimukira yasinywe ku wa 14 Mata 2022. aho u Bwongereza bwatangaje ko buzatanga inkunga yose mu gufasha aba bimukira mu bikorwa by’iterambere.

Gahunda yo kohereza mu Rwanda abimukira n’abasaba ubuhungiro, yahagaritswe mu kwezi gushize, nyuma y’uko Urukiko rw’i Burayi rushinzwe kurengera uburenganzira bwa muntu, rufashe umwanzuro w’uko iryo yoherezwa ryahagarara.

Indege ya mbere yagombaga gukora urugendo ruva mu Bwongereza rugana i Kigali itwaye abimukira binjiye muri iki gihugu mu buryo bunyuranyije n’amategeko, yahagaritswe habura amasaha make ngo itangire urugendo.

U Bwongereza bufite ikibazo gikomeye cy’abimukira, aho muri uyu mwaka abagera ku 14, bamaze kugera muri iki gihugu aho aba bose baba batwawe n’ubwato buto bubambutse umuhora uzwi nka English Channel.