U Rwanda rwashimiwe inkunga yarwo mu muryango wa COMESA

Minisitiri w’Ububanyi n’Amahanga n’Ubutwererane, Dr Biruta Vincent, Kuri uyu wa Mbere tariki 1 Kanama 2022, yakiriye Umunyamabanga Mukuru wa COMESA, Chileshe Mpundu Kapwepwe, washimye u Rwanda ku nkunga rutera uyu muryango.

COMESA, ni Umuryango w’Ubucuruzi uhuza ibihugu byo mu Karere ka Afurika y’Iburasirazuba n’Amajyepfo. U Rwanda ni umunyamuryango kuva muri 2004.

Minisitiri Dr. Biruta yakiriye Chileshe Mpundu Kapwepwe, bagirana ibiganiro byitabiriwe na Minisitiri mushya w’Ubucuruzi n’Inganda, Dr Ngabitsinze Jean Chrysostome. Ni ibiganiro byarimo kandi n’itsinda riherekeje Madamu Kapwepwe.

Mu butumwa bwashyizwe kuri Twitter ya Minisiteri y’ububanyi n’Amahanga n’ubutwererane y’u Rwanda, aba bayobozi baganiriye ku bikorwa by’uyu muryango, ndetse Madamu Kapwepwe ashima ubuyobozi bw’u Rwanda n’inkunga rudahwema gutera ibikorwa bya COMESA.

Madamu Chileshe Mpundu Kapwepwe, ari mu ruzinduko rw’akazi mu Rwanda, aho yagiranye ibiganiro n’abayobozi batandukanye mu nzego z’ubucuruzi.

Madamu Kapwepwe, yagiranye ibiganiro n’Umuyobozi Mukuru w’Urugaga rw’Abikorera, PSF, Stephen Ruzibiza, aho baganiriye ku ngingo zibanze ku guteza imbere ubucuruzi muri COMESA.

Umuryango w’ubucuruzi w’ibihugu by’iburasirazuba n’amajyepfo y’Afurika (COMESA), uhuza ibihugu 21, ubarizwamo abaturage bagera kuri miliyoni 600, ukagira umusaruro mbumbe urenga miliyari 800 z’amadolari ya Amerika.