Nigeria: Abakora ibikorwa byo gushimuta abantu 55 baguye mu bitero by’indege

Igisirikare cya Nijeriya kirwanira mu kirere cyatangaje ko ibitero by’indege cyagabye muri iki cyumweru ku mitwe yitwaje intwaro, byahitanye abagera kuri 55 bazwi mu bikorwa byo gushimuta abantu kugira ngo bababyaze amafaranga mbere yo kubarekura.

Umuvugizi w’icyo gisirikare yavuze ko inyuma y’ibyo bitero abo bagizi ba nabi barekuye abantu bari baragize imbohe.

Reta ya Nijeriya yakomeje gushinjwa ko yananiwe no guhagarika abashimuta abantu ndetse n’ibitero by’abajihadiste.

VOA, ivuga ko ibyo bitero by’indege bikozwe nyuma y’icyumweru Prezida wa Nijeriya Muhammadu Buhari akoranyije inama ku mutekano w’igihugu avuga ko yahaye abashinzwe umutekano uburenganzira bwose bwo guhangana n’abakora iterabwoba.

Nijeriya imaze imyaka irenga cumi n’ibiri irwanya intagondwa zigendera ku mahame ya kiyisilamu.

Mu ntangiriro z’iki cyumweru kandi, igiporisi cya Nijeriya cyatangaje ko cyafashe abantu bane bakekwa kugira uruhare mu gitero cyakozwe kuri kiliziya Gatolika, gihitana ubuzima bw’abakristu 40 muri reta ya Ondo iri mu majyepfo ashyira iburengerazuba.