Kenya: Raila Odinga yahakanye ibyavuye mu matora

Raila Odinga yamaganye ibyavuye mu matora y’umukuru w’igihugu yabaye muri Kenya mu cyumweru gishize.

Mu itangazo yasomeye imbere y’itangazanakuru, Odinga yavuze ko azanyura mu nzira zose zemewe n’amategeko kugirango ibyavuye mu matora bibe imfabusa.

Perezida wa Komisiyo y’Amatora muri Kenya, ku wa mbere yatangaje ko ayo matora yatsinzwe na Willian Ruto ku majwi 50,49% kuri 48,85% ya Raila Odinga.

Gusa mbere y’uko ibyavuye mu matora bitangazwa, bane kuri ndwi bagize komisiyo y’amatora batangaje ko bitandukanyije n’ibigiye gutangazwa byavuye mu matora kubera “umwijima muri iki kiciro cya nyuma” cyo kubara amajwi.

Odinga yashinje Perezida wa komisiyo y’amatora, Wafula Chebukati “kwirengagiza byeruye itegekonshinga”.

Yavuze ati: “Twamaganye twivuye inyuma ibyavuye mu matora y’umukuru w’igihugu”.

Odinga amaze kwanga ibyavuye mu matora ubugira kabiri, mu 2017 urukiko rwemeje ikirego cye maze amatora asubirwamo.

Mbere y’uko Raila Odinga atangaza aho ahagaze, bane kuri ndwi bagize Komisiyo y’amatora bari bagiranye ikiganiro n’abanyamakuru kugirango basobanure impamvu .

Bavuze ko Perezida wa Komisiyo y’amatora, Wafula Chebukati, yabakumiriye ubwo hari hagezweho umwanya wo gutangaza ibyavuye mu matora, hanyuma atangaza imibare irimo amakosa ndetse ibyo bise “itagira umutwe n’amaguru”.

Nubwo bimeze gutya ariko, ibihugu bitandukanye birimwo Reta Zunze Ubumwe za Amerika byakeje Abanya-Kenya uburyo bitwaye mu matora binashima uwayatsinze, William Ruto.

Abakuru b’ibihugu bitandukanye ba Afrika nabo bakeje William Ruto ku ntsinzi yaraye yegukanye.

Raila Odinga w’imyaka 77 bwari ubugira gatanu yiyamamariza umwanya w’umukuru w’igihugu.

William Ruto w’imyaka 55, yari asanzwe ari Visi Perezida wa Uhuru Kenyatta, usoje Manda ye ya Kabiri y’imyaka itanu, akaba atari yemerewe kongera kwiyamamaza nk’uko amategeko ya Kenya abiteganya.

Muri aya matora ariko, Uhuru Kenyatta yahisemo gushyigikira uwo batavugaga rumwe, Raila Odinga.