Yanga wamenyekanye mu gusobanura filime yitabye Imana ku myaka 40

Nkusi Thomas wamenyekanye nka “Yanga” mu gusobanura filime, yitabye Imana azize uburwayi. Yaguye muri Afurika y’Epfo aho yari amaze iminsi arwariye.

Yanga yari yaragiye muri Afurika y’Epfo muri Mata uyu mwaka, icyo gihe yari ajyanye abana be kugira ngo basure umubyeyi wabo cyane ko ariho akorera. Agezeyo, yaje gufatwa n’uburwayi, araremba biza kurangira yitabye Imana mu gitondo cyo kuri uyu wa Gatatu tariki 17 Kanama 2022.

Amakuru yatanzwe n’umuvandimwe we, Bugingo Bonnie uzwi nka Junior Giti mu gusobanura filime, yavuze ko yaguye muri Afurika y’Epfo aho yari amaze iminsi arwariye. Akaba yitabye Imana afite imyaka 40.

Yanga, ubwo yatangazaga ko yakiriye agakiza, yavuze ko byaturutse ku kuba imana yaramukijije kanseri, ni nyuma y’aho mu 2018, yaje kugira uburwayi bukomeye, arwara ikibyimba ku gifu cyaje kumutera kanseri.

Mu 2019, ubuhamya yagiye atanga, yavuze ko yagiye kwa muganga akaza kumenya ko uretse kuba arwaye ikibyimba ku gifu, hari haramaze kujyamo na kanseri.

Akimara kumenya ko arwaye gutya, yarihebye bikomeye atangira gushaka abakozi b’Imana ngo bamusengere.

Nyuma y’igihe arwaye kanseri, bikamutera kwiheba ndetse agatangira no gushaka abamusengera yaje kuyikira nta muntu umubaze, yahise atangira urugendo rwe rwo gushima Imana, akora ivugabutumwa.

Yanga mu biganiro yagiye agirana n’itangazamakuru yavuze ko yatangiye gusobanura filime afite imyaka 17 ubwo yigaga mu mashuri yisumbuye.