Abana 20 b’Ingagi bagiye kwitwa Amazina ku nshuro ya 18

Urwego w’Igihugu rushinzwe iterambere, RDB, kuri uyu wa Gatanu tariki 19 Kanama 2022, rwatangaje ko abana 20 b’Ingagi bagiye kwitwa amazina. Ni abana bavutse mu mezi 12 ashize.

Uyu muhango uzaba ubaye ku nshuro ya 18, utegerejwe tariki 2 Nzeri 2022, ukaba uzakorwa imbonankubone.

Uyu muhango uzabera mu Kinigi mu Karere ka Musanze wari umaze imyaka ibiri uba hifashishijwe ikoranabuhanga kubera icyorezo cya COVID19.

Ni umuhango uzitabirwa n’abantu batandukanye barimo n’ibyamamare mu nzego zirimo kurengera ibidukikije n’imikino. Bazatangira gutangazwa mu cyumweru gitaha.

Urwego rushinzwe Iterambere mu Rwanda (RDB) ruvuga ko urwego rw’ubukerarugendo rutangiye kwijajara nyuma yo gushegeshwa n’icyorezo cya COVID19 muri iyi myaka 2 ishize.

Umuyobozi ushinzwe ubukerarugendo no kurengera urusobe rw’ibinyabuzima muri RDB Ariella Kageruka, avuga ko mu mwaka ushize w’ingengo y’imari warangiye mu muri Kamena 2022, ubukerarugendo bwinjirije igihugu asaga miliyoni 160 z’amadorali, ni ukuvuga hafi miliyari 170 z’amafaranga y’u Rwanda.

Ni mu gihe muri 2019 uru rwego rwari rwinjirije u Rwanda asaga miliyoni 200 z’amadorali, ni ukuvuga asaga miliyari 200 Frw.Kuva umuhango wo kwita izina abana b’ingagi watangira izigera kuri 354 ni zo zahawe amazina.