Perezida Kagame arasura Akarere ka Nyamagabe

Perezida Paul Kagame kuri uyu wa gatanu tariki 26 Kanama 2022, ku munsi wa kabiri w’uruzinduko rw’iminsi ine ari kugirira mu ntara y’Amajepfo n’iy’Iburengerazuba, ararukomereza mu Karere ka Nyamagabe aho abaturage bamwe baraye ku kibuga cya Nyagisenyi aho biteguye ku mwakira.

Aka karere ka Nyamagabe gafite ubuso bwa kilometero kare 1090, gafite igice kinini gikora kuri pariki ya Nyungwe isurwa n’abakerarugendo benshi kubera ikiraro cyo mu kirere [Canopy Walk], ndetse na hoteli ziteye amabengeza nka One & Only Nyungwe House.

Perezida Kagame uru ni uruzinduko rwe rwa kabiri akoreye mu Karere ka Nyamagabe kuva yatangira manda ye ya gatatu kuko yahaherukaga muri Gashyantare tariki 25 na 26. Ni nabwo yahuye n’umukecuru w’imyaka 110 witwa Nyiramandwa Rachel yasuye none.

Nyiramandwa yamenyekanye mu 2010 aramukanya na Perezida Kagame, bakaganira. Kuva ubwo inshuro nyinshi Perezida Kagame yabaga ari mu Karere ka Nyamagabe nabwo barahuraga. Bongeye guhura mu 2017 yiyamamaza no mu 2019. Bikaba biteganyijwe ko Perezida Kagame yongera gusura uyu Mukecuru mbere yo kuganira n’abaturage ba Nyamagabe.

Mu gitondo cyo kuri uyu wa gatanu ibihumbi by’abaturage bo muri aka Karere bateraniye ku Kibuga cy’Umupira cya Nyagisenyi aho biteguye kwakira Perezida Kagame.

Bamwe muri abo baturage bageze kuri iki kibuga ku manywa yo ku wa Kane, barara babyina biteguye kwakira Umukuru w’Igihugu. Buri wese aragaragaza umunezero mu buryo bwe, mu ndirimbo n’imbyino.

Ku mugoroba wo ku wa Kane, nyuma yo gusura abaturage bo mu Karere ka Ruhango, Perezida Kagame yahuye n’abavuga rikumvikana 800 bo mu Ntara y’Amajyepfo, baganira ku ngingo zinyuranye zirebana n’imibereho n’iterambere ry’abaturage.