Depite Kayabaga wo muri Canada arashima uruhare rw’umugore mu iterambere ry’u Rwanda

Abadepite bo mu itsinda ry’inshuti z’u Rwanda baturutse muri Canada bagiranye ikiganiro na Perezida w’Umutwe w’Abadepite Donatille Mukabalisa  aho bagiranye ibiganiro byagarutse ku mubano hagati y’ibihugu byombi Canada ndetse n’u Rwanda.

Arielle Kayabaga ni umwe muri abo badepite avuga ko yigiye ku Rwanda byinshi birimo iterambere nyuma ya Jenocide yakorewe Abatutsi. Ndetse ashima imbaraga zikomeje gushyirwa mu guteza imbere ubushuti buri hagati y’inteko ishingamategeko y’u Rwanda n’iya Canada.

“Ndimo kwiga byinshi ku bijyanye n’uburinganire, uruhare rw’umugore, ndetse n’ishoramari abantu bashora hano mu Rwanda, ndetse ku buryo dushobora gukomeza kwiga ibintu byinshi hagati y’ibi bihugu byombi, ndetse n’uburyo dushobora gushimangira umubano.”

Mukabalisa Donatille yavuze ko bishimiye umubano wa Canada n’u Rwanda ndetse ko hashyizweho itsinda ry’ubucuti hagati y’ibihugu byombi mu rwego rwo kuwongerera imbaraga kurushaho.

“Twashyizeho itsinda ry’ubucuti bw’abadepite, kandi twiyemeje gukomeza guteza imbere ubufatanye buriho, kuko dufite byinshi twigiranaho mu gukorera Inteko zishinga amategeko, ibihugu byacu muri rusange, ndetse n’abaturage duhagarariye.”

Depite Arielle Kayabaga, ku wa Kabiri yabonanye na Minisitiri w’Ububanyi n’Amahanga n’Ubutwererane, Dr Vincent Biruta. Baganira k’ubufatanye n’imbaraga zikwiye gushyirwa mu kunoza umubano hagati y’ibihugu byombi.

Uyu mudepite kandi yanasuye Urwibutso rwa Jenoside rwa Kigali, yunamira abatutsi bishwe muri Jenoside yakorewe Abatutsi bahashyinguye, avauga ko ibyabaye bigomba kuba isomo kuri buri wese.

“Nagize amahirwe yo guha icyubahiro abazize Jenoside yakorewe Abatutsi mu 1994 ku rwibutso rwa Jenoside rwa Kigali mu Rwanda. Aya makuba akwiye kutubera isomo twese ko dukwiye koroherana tutitaye kubidutandukanya.”