Ubushinwa bwasabye Amerika guhagarika amasezerano yo kugurisha intwaro Taiwan

Amerika yemeye kugurisha kuri Taiwan intwaro zifite agaciro ka miliyari 1.1 z’amadolari, bituma Ubushinwa burakara.

Aya masezerano ateganyijwe yo kugurisha intwaro arimo ubwirinzi bwa radar bwo kugenzura ibitero by’indege byerekeza muri Taiwan hamwe n’ibisasu bya misile bisenya amato n’ibisenya indege.

Bibaye nyuma yuko umukuru w’inteko ishingamategeko y’Amerika, umutwe w’abadepite, Nancy Pelosi, mu kwezi gushize abaye umutegetsi wa mbere wo ku rwego rwo hejuru cyane wo muri Amerika usuye Taiwan mu myaka 25 ishize.

Ambasade y’Ubushinwa i Washington yasabye Amerika kuburizamo ayo masezerano yo kugurisha intwaro, bitaba ibyo igahura “n’ingamba zo kwihimura”.

Umuvugizi w’iyo ambasade, Liu Pengyu, yavuze ko ayo masezerano “abangamiye bikomeye” umubano hagati ya Washington na Beijing. Nk’uko tubikesha BBC

Ubushinwa bubona iki kirwa, gifite ubutegetsi bwacyo, nk’igice cy’ubutaka bwabwo, kandi bushimangira ko iki kirwa gikwiye guhuzwa n’ubutaka busanzwe bw’Ubushinwa, no ku ngufu bibaye ngombwa.

Ayo masezerano y’Amerika yo kugurisha izi ntwaro kuri Taiwan, yemeranyijweho ku wa gatanu, aracyacyeneye gutorerwa n’inteko ishingamategeko y’Amerika ishyigikiye bikomeye Taiwan.

Mu kwezi gushize, Pentagon yashyizeho itsinda ryo gufasha mu kunoza igurishwa ry’intwaro z’Amerika ku nshuti zayo zo mu mahanga, nkuko byatangajwe ku wa gatanu n’ikinyamakuru the Wall Street Journal cyo muri Amerika.