Cabo Delgado: Ituze n’umutekano byatumye abarenga ibihumbi 130 bagaruka mu byabo

Nyuma y’umwaka, inzego inzego z’umutekano z’u Rwanda zitangiye ibikorwa byo kugarura umutekano mu Ntara ya Cabo Delgado muri Mozambique, abarenga ibihumbi 130, bamaze kugaruka mu ngo zabo.

Abaturage bamaze gusubira mu byabo barashima inzego z’umutekano z’u Rwanda, zabagaruriye ikizere cyo kubaho bakagaruka mu ngo zabo nyuma y’igihe kinini barazitaye kuberabibikorwa by’iterabwoba.

Uyu munsi baremeza ko ubuzima bwongeye gusubira ku murongo, ndetse ubu bakaba barasubukuye imirimo yabo itandukanye irimo ubucuruzi. Aba baturage, bavuga ko basanze imitungo yabo yarangiritse, harimo amazu yatwitswe n’ibyihebe.

Palma na Mocimboa da Praia ni uturere twombi two mu Ntara ya Cabo Delgado ahabarizwa ibirindiro by’ingabo z’u Rwanda.

Maj Gen Eugene Nkubito, umuyobozi ushinzwe guhuza ibikorwa by’ingabo z’u Rwanda, aganira na The New Times, yatangaje ko nyuma yo kugarura umutekano mu duce twinshi twari twarigaruriwe n’imitwe y’iterabwoba, abagize inzego z’umutekano b’u Rwanda na bagenzi babo bo muri Mozambike batumye kugeza ubu abarenga 130.000 basubira mu bice bari bauyemo ndetse bakomeza ubuzima bwabo busanzwe.

Gen Nkubito yongeyeho ko: “kugeza uyu munsi hari ibigaragara mu kwimakaza umutekano.”

Inzego z’umutekano z’u Rwanda zabashije kurokora abasivili babarirwa mu magana bari mu maboko y’ibyihebe kandi zibasha kubaka umubano mwiza mu kazi hagati yabo ndetse na bagenzi babo bari mu butumwa bw’umuryango w’ibihugu byo muri Afurika y’amajyepfo (SAMIM) ndetse na Mozambique nk’igihugu cyabakiriye.

Yagize ati: “Dufitanye umubano mwiza n’abaturage bo mu karere ka Palma ndetse n’akarere ka Mocimboa da Praia.”Ingabo z’u Rwanda nazo zifatanya n’ingabo za SADC.

Gen Nkubito yagize ati: “Nyuma yo gukora ibikorwa byinshi bihuriweho harimo n’ibyakozwe vuba aha, igikorwa cyiswe ’ibirunga’, cyatumye abanzi bava mu ishyamba rya Catupa, mu Karere ka Macomia, umwanzi yacitse intege.”

Akarere ka Macomia ntabwo kari mu nshingano z’inzego z’umutekano z’u Rwanda ariko zahakurikiye ibyihebe ku bufatanye n’ingabo za SADC.

Yakomeje agira ati: “Ibi byatumye umubare munini w’abantu bakuwe mu byabo basubira mu ngo zabo mu gihe ibikorwa byo kubungabunga umutekano ndetse n’ibikorwa byo kwimakaza umutekano bikomeje. Abantu barenga 130.000 bavanywe mu byabo basubiye mu ngo zabo no mu midugudu yabo.”

Muri rusange, nubwo imihanda itsri myiza, cyane cyane mu gihe cy’imvura, no kutagira umuyoboro w’itumanaho rigendanwa cyane cyane mu turere twa kure, abashinzwe umutekano b’u Rwanda na bagenzi babo bo muri Mozambique bashoboye gukurikirana, kwambura intwaro n’ibikoresho “byinshi” ibyihebe. kimwe no gusenya “ibirindiro by’abanzi” no kubabuza “ubwisanzure mu bikorwa.”

Gen Nkubito yagize ati: “Ibice byose bifitwe mu nshingano n’inzego z’umutekano z’u Rwanda bifite umutekano.”

Sumail Buancu, ufite imyaka 35, umucuruzi mu mujyi wa Palma, yatangarije The New Times ko yari yaratakaje icyizere cyo kuzasubira mu rugo.

Yongeyeho ati: “Twarasenze cyane dusaba amahoro kandi, ku bw’amahirwe, twarayabonye. Ubu turimo gukora. ”

Awa Ali Momadi, undi mubyeyi wagurishaga amazi hafi aho, yagize ati: “Turashimira Imana kuba dufite Abanyarwanda n’Abanya Mozambike bakorera hamwe kugira ngo babohore Palma. Turishimye. ”

Kuri Momadi, ubuzima buragoye, ariko kugeza ubu ni byiza kurenza uko abantu be bahoraga bahunga, batinya ko bashobora gufatwa bakicwa n’ibyihebe.

Muri Nyakanga 2021, bisabwe na guverinoma ya Mozambike, u Rwanda rwohereje ingabo muri Cabo Delgado kugira ngo zifashe kurwanya imitwe y’iterabwoba ryari ryarayogoje iyo ntara iri mu Majyaruguru y’icyo gihugu.

Mu nshingano ingabo z’u Rwanda zari zifite kandi harimo kubungabunga amahoro no kugarurira leta ibice bimwe byari byarabaye indiri yimitwe y’ibyihebe. Inzego z’umutekano z’u Rwanda zagombaga gukorana bya hafi cyane n’ingabo za Mozambique kimwe n’ingabo zo muri SADC.

Cabo Delgado ifite uturere 16. Abibasiwe cyane n’ibikorwa by’imitwe y’iterabwoba ni abaturage bomuri Palma, Mocimboa da Praia, Mueda, Mocamia, Muidumbe na Nangade.