Kiliziya gatolika izakomeza gusigasira inyubako z’ahahoze gereza nkuru ya Kigali

Kiliziya Gatolika igiye kwimurira katederali yayo ya St Michel ahahoze Gereza Nkuru ya Kigali izwi ku izina rya 1930, ariko Kiliziya izakomeza gusigasira igishushanyo mbonera cya gereza nk’ahantu ndangamurage.

Muri Nyakanga 2018, nibwo itsinda rya nyuma ry’abagororwa bavuye muri iyi gereza aho bari bimuriwe muri gereza nshya ya Nyarugenge, yari imaze kuzura mu murenge wa Mageragere, mu karere ka Nyarugenge.

Ibi byatumye ubutaka bwa hegitari 5.5 busigaye budafite ikibukorerwaho, nyuma Kiliziya Gatolika iza kubusaba kugira ngo yimure Paruwasi ya St Michel.

Mu kiganiro n’ikinyamakuru The New Times, Marie Solange Muhirwa, Umuyobozi Mukuru Ushinzwe Igenamigambi ry’Imitunganyirize y’Umujyi, yavuze ko zimwe mu nyigo z’ivugurura ry’icyahoze ari gereza zarangiye ariko ko hakiri ibindi byo kunoza.

Muhirwa yagize ati: “Turimo gukorana na Kiliziya Gatolika kugira ngo turebe igikwiye gusigasirwa kuko ari ahantu h’amateka”.

Iyi yahoze ari gereza ni imwe mu nyubako zo hambere mu mujyi Kigali ndetse iyubakwa ryayo ryarangiye mu 1930 bityo yitirirwa Gereza ya “1930”.

Katederali nkuru ya Kigali, ari nacyo cyicaro cya Arikidiyosezi ya Kigali, kuri ubu iri kuri paruwasi ya St Michel mu Kiyovu, ni ntoya ndetse irashaje kuko itanajyanye n’igihe.

Bamwe mu bayobozi bakuru muri Kiliziya batifuje ko amazina yabo ajya ahagaragara baganiriye n’ikinyamakuru cya The New Times, bemeza ko umushinga ukomeje kandi ko hari itsinda ryashyizweho ririmo nabo muri leta kugira ngo ryige kuri uwo mushinga.

Icyo kinyamakuru kandi gitangaza ko igishushanyo mbonera cy’uko iyi katederali izaba imeze cyamaze kurangira ariko kitarashyirwa ahagaragara.

Icyo gishushanyo kizatuma katederali ya Kigali nayo iba ahantu h’ubukerarugendo. Kugeza ubu ntiharamenyekana igihe imirimo yo kubaka izatangirira. Ariko, Kiliziya yari ryasabwe gutanga igishushanyo kirimo ibisobanuro birambuye kuburyo bateganya kwinjiza izi nyubako zishaje za gereza mu mishinga yayo.

Mu gishushanyo mbonera cy’Umujyi wa Kigali, hari ibice bine birimo; icyahoze ari gereza nkuru ya Kigali, Paruwasi Gatolika ya Sainte Famille, ndetse n’agace k’Ubucuruzi kazwi nka Matheus hashyizwe mu hantu ndangamurage.

Mu gihe Umujyi wa Kigali ukomeje gukataza mu kuzamurwamo amazu mashya no kuvugurura ashaje, abayobozi bavuga ko batekereza no ku nyubako zifite akamaro mu mateka.

Hagati aho, hari amakuru avuga ko ahandi hatahiwe ari mu gace k’ubucuruzi, ahazwi ku izina rya Quartier Matheus, aho zimwe mu nyubako zo hambere ziherereye muri ako gace zizasigasirwa.

Ahandi hantu hazasigasirwa ni Kiliziya Gatolika ya Sainte Famille, yubatswe mu 1913, nk’urusengero rwubatswe mbere y’izindi muri Kigali.