Cardinal Kambanda yasomeye Misa muri Gereza ya Nyarugenge, 23 barakomezwa

Antoine Cardinal Kambanda, yaturiye igitambo cya Misa muri Gereza ya Nyarugenge izwi nka Mageragere, muri Santarali yaragijwe Mutagatifu Tereza w’Umwana Yezu, kuri iki cyumweru tariki ya 02 Ukwakira 2022, maze abantu 23 barakozwa.

Cardinal Kambanda yasomeye Misa muri Gereza ya NyarugengeNi mu rwego rwo kwizihiza Umunsi mukuru wa Mutagatifu Tereza w’Umwana Yezu, witiriwe iyo Santarali y’iyo gereza, biba n’umwanya wo gutanga Isakaramentu ry’ugukomezwa ku bigishwa 23 bo muri iyo Gereza.

Ni igitambo cya Misa cyitabiriwe n’abayobozi banyuranye biganjemo abo mu Rwego rw’Igihugu rushinzwe imfungwa n’abagororwa (RCS), barimo umuyobozi wungirije w’urwo rwego, DCGP Rose Muhisoni, Umuvugizi wa RCS, SSP Pelly Uwera Gakwaya ndetse n’Umuyobozi wa Gereza ya Nyarugenge, SP Uwayezu Augustin.

Mu kanyamuneze kagaragaye ku maso y’imfungwa n’abagororwa, aho abenshi muri bo bari bambaye amashapure n’ibindi birango by’Umukirisitu wa Kiliziya Gatolika, ni nabo biyoboreye imwe mu mihango ikorwa n’abakirisitu mu gitambo cya Misa.

Mu butumwa bwe, Antoine Cardinal Kambanda yagize ati “Nta cyaha Imana itababarira, icyo usabwa n’uko wicuza”.

Yabibukije ko Imana yaremye abantu bose ibakunda, kandi ikomeza kubakunda n’ubwo abantu bayihemukira, ngo ni nabwo yoherereje abantu Umwana wayo Yezu Kirisitu ngo aze kubacungura.

Ati “Imana yatwoherereje umwana wayo Yezu Kirisitu ngo aducungure, atwereka ko n’umunyabyaha Imana imukunda nka wa mwana w’ikirara, wumvaga ise adashobora kumubabarira aravuga ati, wenda nzamwisabira akazi niba nabyo yabinyemerera, ahingutse ise aramwakira kuko Imana itandukanya umuntu n’icyaha”.

Yongeye ati “Imana itwigisha gukunda umuntu tukamuha icyubahiro akwiye, ariko tukanga icyaha cye n’ububi bwe ndetse na we asabwa kwitandukanya n’icyaha cye, kuko aba ari umuntu ufite agaciro imbere y’Imana”.

Cardinal Kambanda yababwiye ko batari bonyine ko Imana bahorana nayo, aho ngo iba ikomanga ku muryango itegereje kwakira umutima w’abantu yaremye, abibutsa ko Umutima ubwiriza umuntu kureka ikibi agakora icyiza ari Roho Mutagatifu wakomeje ubutumwa Yezu yatangiye, ari we rukundo ruhuza Data na Mwana akaba Roho w’urukundo rw’Imana n’ubuzima bwayo”.

Yabwiye imfungwa n’abagororwa kandi ko isomo ryasomwe kuri iki cyumweru, rijyanye n’ubuzima babayeho, aho yavuze ko Paul Mutagatifu na we yitagatifujwe ari mu buroko, asaba abahawe isakaramentu ryo gukomezwa kuba abahamya b’urukundo no muri Gereza.

Ati “Ahantu hose uri ushobora kuba umuhamya w’urukundo, namwe muri hano cyane cyane abakomejwe murasabwa kuba abahamya b’urukundo, abakiri bato bafasha abageze mu za bukuru. Paulo Mutagatifu ari mu buroko ntiyahwemye kwigisha no gufasha bagenzi be, nawe aho uri wigishe, impano n’ubwenge ufite uzikoreshe neza uzihesha ikuzo ugirira abandi akamaro”.