Tito Rutaremara yagaragaje amateka y’ivuka bwite rya RPF

Kuri uyu wa Kabiri tariki 04 Ukwakira, Mu butumwa yasangije abamukurikira ku rukuta rwe rwa Twitter, Tito Rutaremara yagaragaje amateka y’ivuka bwite ry’Umuryango wa RPF, n’impamvu wiswe Inkotanyi.

Tito Rutaremara agaruka kuri ayo mateka yikije cyane ku nteko rusange ya RANU (Rwandese for National Alliance Unit) yateranye mu Ukuboza 1987 nyuma ya Noheri.

Avuga ko yaririmo abasivile n’abasirikare, ikaba kandi yarigizwe n’abantu bava mu bice byinshi bitandukanye by’isi, harimo abavaga muri Kenya, Uganda, Tanzania, Burundi, Zaire ari yo Repubulika ya Demokarasi ya Congo y’uyu munsi, u Burayi, Rwanda no muri Afurika y’uburengerazuba.

Tito Rutaremara, icyo gihe wari Umuyobozi w’itsinda yavuze ko ubwo habaga iteko rusange ya RANU, aribwo bicaye bagasanga iri zina bari basanganywe rigomba guhinduka mu rwego rwo kubaka umuryango w’abanyarwanda ufite imbaraga Kandi zihangana n’uwo ariwe wese.

Yagize ati: “Nyuma y’ijambo rya peresida wa RANU Hon. Mutimura Zeno n’umunyamabanga mukuru wa RANU Hon. Musoni Protais, chairman w’itsinda ariwe jye [Tito Rutaremara] twari twarahawe kuvugurura RANU, twagejeje kubitabiriye iyo nama inyandiko zirimo: gahunda za politiki, imirongo migari y’ibikorwa, Amategeko agenga imyitwarire, Option Z (itaramuritswe), nyuma y’impaka nyinshi izi nyandiko zaremejwe.”

Yungamo ati: “Chairman w’itsinda [ariwe Tito Rutaremara], ageza ku bitabiriye kongere ko izina twari dusanganywe rikwiye guhinduka, impamvu yatangwaga nuko hifuzwaga kubaka umuryango w’abanyarwanda (mass movement) ufite imbaraga zigomba guhangana n’uwo ariwe wese.”

Muzehe Tito Rutaremara yavuze ko umuryango bifuzaga wagombaga kuba ufite imbaraga ndetse kandi ushinze ingamba (Front), kuko basangaga ibyari bisanzwe (alliance) bidafite imbaraga nk’uko babyifuzaga.

Yakomeje agira ati: “FPR (front patriot Rwandais) – RPF (Rwandan Patriotic Front) yari amazina yacu ku banyamahanga, naho mu banyarwanda twari INKOTANYI, kuko mu kinyarwanda cyacu cy’abakurambere bacu buri mutwe w’ingabo wagiraga izina bwite.”

Yakomoje ku mpamvu bawise Inkotanyi ndetse n’aho byaturutse.

Ati: “Mu bakada ba mbere twazanye kwiga hari abasaza b’abahanga bize primary (amashuri abanza) gusa kuko batari baragize amahirwe yo gukomeza kwiga, Twifuzaga kubaha inyigisho twigishaga ngo tumenye niba abantu batarangije amashuri ya za secondaire (yisumbuye) bakumva amasomo ya filozofiya twigishaga.”

Niko kubaza umwe muri abo basaza bati: “Ese umuntu uharanira ibye, akabirwanira ashyizeho umwete, agakora yivuye inyuma, ntiyemere gutsindwa niyo yatsindwa akangera akabyuka agakomeza guharanira bya bindi kugeza igihe abiboneye (strugglist), twamwita nde?.”

Muzehe Tito, yavuze ko umwe muri abo basaza witwaga Kanyarushoki (Alias Muramutsa), yabasubije ko uwo muntu aba ari Inkotanyi.

Ati: “Uko ni ugukotana ubikora aba ari Inkotanyi. Izina turarifata turiha ikinyamakuru cyacu cyitwa: INKOTANYI.”

Muri ubu butumwa bugaruka ku mateka yo kuvuka bwite by’umuryango wa RPF INKOTANYI, yavuze ko ariwo wabaye umutwe w’ingabo z’Abanyarwanda.

Yagarutse no kumpamvu wifuzwaga kuba umuryango w’abanyarwanda, (Mass Movement) ndetse n’aho byakomotse.

Agaragaza ko bihera ku kuba Inkotanyi zakira buri mu Nyarwanda wese nta numwe uhejwe zikabaha kubyiyumvamo.

Ati: “Inkotanyi zakira buri mu Nyarwanda wese (inclusive), iyo baje zirabakangura (mobilization) zikabaha kubyiyumvamo (sensitization), zikabigisha politike (politicization). Iyo nkubiri y’Abanyarwanda niyo Front.”

Yavuze ko Inkotanyi ari umuryango kuko wakira abanyarwanda bose kandi utagamije kubirukana ahubwo ko uwawugezemo ari we wiyirukana. Ati: “Abo banyamuryango twese tuba dusangiye gupfa no gukira ari uwaje kera n’uwaje vuba.”

Tito Rutaremara wari chairman w’itsinda yasoje avuga ko nyuma yo kwemeza izina INKOTANYI, RPF n’ inyandiko; hatowe abayobozi bashya bajya mu myanya isanzwe ndetse n’imishyashya yari yavutse.

Mu gice gitaha cy’amateka ku muryango wa RPF Inkotanyi, yavuze ko azagaruka k’uburyo inzego za RPF zakoraga n’uko zakoranaga n’inzego za RPA.