Minisitiri Ngirente yagiranye ibiganiro na mugenzi we wa Estonia

Mu gitondo cyo kuri uyu wa kabiri tariki 11 Ukwakira 2022, Minisitiri w’Intebe Dr. Ngirente yabonanye na Minisitiri w’Intebe wa Estonia Kaja Kallas, baganira ku bufatanye no gushimangira umubano w’ibihugu byombi.

Minisitiri w’Intebe Dr Edouard Ngirente, ari muri Estonia aho ahagarariye Perezida Kagame mu nama mpuzamahanga y’iminsi ibiri ku ikoranabuhanga (Tallinn Digital Summit).

Minisitiri Ngirente ubwo yatangaga ikiganiro ku bitabiriye iyi nama, ku munsi wa mbere yavuze ko icyorezo cya Covid-19 cyagaragaje ko hakwiye imikoranire mu guteza imbere ikoranabuhanga.

Yagaragarije abitabiriye iyi nama ko u Rwanda ari Igihugu gishyize imbere imikorere ishingiye ku ikoranabuhanga. Avuga ko ubu serivisi za Leta zitangwa mu buryo bw’ikoranabuhanga ku kigero kiri hejuru ya 90%.

Minisitiri Ngirente yavuze kandi ko hakenewe imikoranire n’ibindi bihugu kuko ikoranabuhanga ritagira umupaka.

Estonia yakiriye iyi nama, ni kimwe mu bihugu biteye imbere cyane mu ikoranabuhanga kikanaba igihugu gifite imikoranire n’u Rwanda muri uru rwego rwo guteza imbere ikoranabuhanga.