Perezida Kagame yagiranye ibiganiro n’Umuyobozi w’Umuryango wita ku bimukira

Perezida Paul Kagame, ku wa gatanu tariki 21 Ukwakira 2022, yagiranye ibiganiro n’umuyobozi mukuru w’Umuryango mpuzamahanga wita ku bimukira, António Vitorino.

Ibiro by’Umukuru w’Igihugu byatangaje ko Perezida Kagame na Antonio, bagiranye byibanze ku bufatanye mu kurwanya icuruzwa ry’abantu n’izindi ngingo zitandukanye.

Mu nama ya karindwi y’Ihuriro Nyafurika ku Bimukira n’Impunzi, (PAFOM) yaberaga i Kigali muri uku kwezi k’Ukwakira, yemerejwemo ko u Rwanda arirwo rugiye kuyobora iryo huriro mu gihe cy’imyaka ibiri iri imbere.

Muri iyo Manda, u Rwanda ruzashyira imbaraga mu gushaka icyafasha Afurika kugabanya ibibazo by’abaturage bayo bajya gushakira ubuzima bwiza i Burayi.

Umuyobozi Mukuru ushinzwe Afurika muri Minisiteri y’Ububanyi n’Amahanga n’Ubutwererane, Shakilla Umutoni Kazimbaya yavuze ko inshingano z’u Rwanda nk’igihugu kigiye kuyobora iri huriro ari ukugenzura ko imyanzuro izafatirwa muri iyi nama ishyirwa mu bikorwa no gushaka ibindi bishya byafasha mu kurwanya ikibazo cy’Abimukira n’abajya gusaba ubuhunzi mu bihugu byo hanze ya Afurika.

Umuryango Mpuzamahanga ushinzwe Abimukira utangaza ko kuva uyu mwaka watangira abimukira 224 bamaze gupfa barohamye bashaka kujya i Burayi mu gihe abandi basaga 800 bo baburiwe irengero.