Uganda: Abantu batatu basanganywe Ebola i Kampala

Muri Uganda, ministiri w’ubuzima yatangaje ko abantu batatu bari mu kato mu gice cy’ibitaro bikuru by’igihugu, Mulago nyuma yo gusanga baranduye Ebola.

Jane Ruth Aceng, mu butumwa yanditse kuri Twitter yavuze ko ku wa Gatanu tariki 21 Ukwakira habonetse abantu batatu muri 60 basanganywe Ebola aho bahise bashyirwa mu Kato.

Ati: “Ejo tariki 21 Ukwakira, abantu batatu muri 60 byamenyekanye ko bafite Ebola aho bashyizwe mu Kato mu mazu yabugenewe i Mulago”.

Yakomeje agira ati: “Bazimurirwa Entebbe kuvurirwa yo, kubera ko Mulago igifite abantu 58 bagikurikiranirwa hafi bari mu kato”.

Yavugaga ko abo barwayi bajyanwe ku bitaro bya kabiri biri mu bilometero 41 kure ya ho.

Minisitiri Ruth Aceng, yavuze ko abo bagaragaweho Ebola, bafite aho bahuriye n’umuntu wanduriye mu gace ka Kassanda waje kwitaba Imana aguye mu bitaro bya Mulago.

Ibitaro bya Mulago biri mu murwa mukuru wa Uganda Kampala. Abantu bagaragaweho na Ebola kuwa gatanu, baba baribo ba mbere bamenyekanyeho ubwandu bwa virusi ya Ebola mu murwa mukuru Kampala.

Abo batangajwe ku munsi umwe minisitiri w’itangazamakuru yavugiyeho ko icyorezo cya Ebola cyagenje amaguru make kandi byari byitezwe ko kiba cyarangiye mbere y’impera z’umwaka.

Itangazo rya guverinema ryo mu ijoro ryo ku wa gatanu, ryavagaga ko icyorezo cyanduwemo n’abantu 65 kandi cyishe 27. Gusa byari bitarasobanuka niba, iyo mibare irimo abo batatu bashya b’i Kampala.

Guverinema ya Uganda yavuze ko mu cyumweru gishize, abandi bantu babiri bemejweho Ebola i Kampala, bari baturutse i Mubende aho iyo ndwara yabonetse bwa mbere, ari naho bakomoka