Amerika irashinja Koreya ya Ruguru kugurisha intwaro u Burusiya

Perezidansi ya Leta zunze ubumwe za Amerika, White House, irashinja Koreya ya ruguru kohereza intwaro rwihishwa mu Burusiya zo gufasha mu ntambara yo muri Ukraine.

Umuvugizi w’akanama k’igihugu gashinzwe umutekano, John Kirby yabitangaje ku wa gatatu ariko yirinze gutagnaza imibare nyirizina y’izo ntwaro byohererejwe u Burusiya.

Kirby yavuze ko Amerika ikomeje gukurikiranira hafi niba izo ntwaro zarakiwe n’u Burusiya. Yongeyeho ko Amerika yibaza igihugu cyangwa ibihugu izo ntwaro zanyujijwemo arinayo mpamvu yirinze kugira byinshi abitangazaho.

Kirby yatangaje kandi ko izi ntwaro Koreya ya ruguru yohereje u Burusiya ntaco bizahindura ku ntambara kuko ibihugu byo mu burengerazuba nabyo birimo gutekereza uko byakohereza muri Ukraine intwaro n’ubundi bufasha mu bya gisirikare.

Ibi bitangajwe nyuma y’aho leta ya Perezida Joe Biden mu kwezi kwa gatandatu itangaje ko igisirikare cy’u Burusiya cyakiriye indege za drone amagana zakorewe muri Irani zo kuyifasha mu ntambara yo muri Ukraine.