Abayobozi ba EAC mu biganiro na Tshisekedi ku guhosha amakimbirane muri DRC

Kuri iki cyumweru ndetse no ku wa mbere, abayobozi b’Umuryango w’Afurika y’Iburasirazuba (EAC) bagomba guhura na Perezida wa DR Congo, Felix Tshisekedi, mu murwa mukuru Kinshasa mu biganiro byo ku rwego rwo hejuru ku makimbirane ari mu burasirazuba bw’iki gihugu.

Ibi biganiro bitangajwe mu gihe imirwano ikaze yongeye kubura hagati y’ingabo za leta ya Congo (FARDC) n’umutwe w’inyeshyamba wa M23, aho ibitangazamakuru ryatangaje ko izi nyeshyamba zegereye cyane Goma, umurwa mukuru w’intara ya Kivu y’Amajyaruguru.

Nk’uko byatangajwe na EAC, Uhuru Kenyatta wahoze ari perezida wa Kenya akaba n’umuhuza mu biganiro by’amahoro hagati ya DRC na M23, yerekeje i Kinshasa kuri iki cyumweru, tariki ya 13 Ugushyingo, aho agomba kuhahurira na Evariste Ndayishimiye, Perezida w’u Burundi akaba n’umuyobozi wa EAC muri iki gihe ndetse na Peter Mathuki, umunyamabanga mukuru w’uyu muryango.

The New Times, ivuga ko itangazo yabonye rya EAC, “Kugeza ubu amahoro mu burasirazuba bwa Repubulika Iharanira Demokarasi aricyo kintu cy’ingenzi gikenewe mu karere.”

Ibi biganiro by’iminsi ibiri biraba nyuma y’icyumweru kimwe abakuru b’ibihugu na za guverinoma bo muri EAC bahuriye i Sharm El Sheikh, mu Misiri mu nama yigaga ku kibazo cy’intambara yo mu Burasirazuba bwa Repubulika ya Demokarasi ya Congo, maze basaba ko habaho ibiganiro by’ubufatanye mu rwego rwo kuzana amahoro arambuye mu burasirazuba bwa DRC, ahabarizwa imitwe yitwaje intwaro irenga 130.

Guverinoma ya Congo ishinja u Rwanda gushyigikira inyeshyamba za M23, ibirego rwakomeje kwamaganira kure rukavuga ko ari ikibazo kireba leta ya Congo.

Kurundi ruhande u Rwanda rwakomeje kugaragaza impungenge ku bufatanye bwa FARDC na FDLR, umutwe w’ingabo ugizwe n’abasize bakoze Jenoside mu Rwanda, bakomeje no kuruhungabanyiriza umutekano.

Ingabo za DR Congo na FDLR zarashe ku butaka bw’u Rwanda inshuro eshatu muri uyu mwaka mu gihe indege y’intambara ya DR Congo iherutse kuvogera ikirere cy’u Rwanda maze igwa ku kibuga cy’indege cya Rubavu mu Ntara y’Iburasirazuba.

Umwuka utifashe neza hagati y’u Rwanda na DR Congo watumye guverinoma ya Kinshasa ifata umwanzuro wo kwirukana ambasaderi w’u Rwanda mu mpera z’Ukwakira.

Ibi biganiro bya EAC bije bikurikira uruzinduko rwa Perezida wa Angola, João Lourenço aheruka kugirira i Kigali na Kinshasa.

Perezida Lourenço akaba asanzwe ari umuhuza hagati y’u Rwanda na RD Congo binyuze mu nama Mpuzamahanga y’umutekano ku karere k’ibiyaga bigari (ICGLR).

Itangazo rya EAC rivuga ko abakuru b’ibihugu bya EAC bose uko ari barindwi biyemeje kugira uruhare muri iki kibazo.

Icyakora, ntirisobanura niba umwanzuro wo kohereza ingabo z’akarere kose zizajya guhangana n’imitwe yitwaje intwaro muri DR Congo, iz’u Rwanda zikomeza gukumirwa.