Umupira Diego Maradona yatsindishije akaboko wagurishijwe muri cyamunara nyuma y’imyaka 36

Umupira Diego Maradona yatsindishije ikiganza mu mikino y’igikombe cy’Isi mu 1986 mu mukino Argentina yakinaga n’u Bwongereza, wagurishijwe asaga miliyona 2 z’amadorari nyuma y’imyaka 36 ubitswe.

Uyu mupira wari ubitswe na Ali Bin Nasser ukomoka muri Tunisia, ni we wari umusifuzi wo hagati mu mukino wa ¼ ubwo u Bwongereza bwakinaga na Arigentina.Iki gikombe cy’isi cyo mu 1986 cyakiriwe na Mexico.

Ku munota wa 51 nibwo ku mupira wari uturutse hagati mu kibuga Maradona yawukurikiye asimbuka ashaka kuwutanga Peter Shilton wari umuzamu w’u Bwongereza icyo gihe, ariko Maradona asimbutse akozaho akaboko umupira uruhukira mu izamu umusifuzi Ali Bin Nasser ntiyamenya uko bigenze.

N’igitego cyateje imvururu ariko ntizagira icyo zitanga kuko igitego cyakomeje kwemerwa n’ubwo Abongereza bakomeje gutaka bavuga ko umupira Maradona yawutsindishije akaboko.

Nyuma y’uyu mukino, Ali Bin Nasser yatahanye uyu mupira arawubika kugera aho muri iki cyumweru yahisemo kuwushyira mu cyamunara.

Uyu mupira ukimara gushyirwa mu cyamunara, muri Graham Budd Auctions wahise ugurishwa amafaranga agera kuri miliyoni 2 n’igice z’amadorari.