USA: Uwitwaje intwaro yahitanye abantu 5 akomeretsa 25 muri leta ya Colorado

Umugabo w’imyaka 22 yishe arashe abantu batanu akomeretsa abandi 25 bari mu kabyiniro gakunze guhuriramo n’abakundana bahuje igitsina, mu mujyi wa Colorado Springs, muri leta ya Colorado, mu burengerazuba bwa leta zunze ubumwe za Amerika.

Umukuru wa Polisi muri uwo mujyi, Adrian Vasquez, yavuze ko ubwo bugome bwabaye mw’ijoro ryo kuwa gatandatu rishyira ku Cyumweru, ndetse ko hatoraguwe imbunda ebyiri aho uko kurasa kwabereye.

Abakora iperereza bavuze ko bakirimo barashakisha impamvu y’icyo gitero, ariko umucamanza mukuru w’akarere ka El Paso uwo mujyi uherereyemo, Michael Allen, yavuze ko abayobozi bakireba niba icyo cyaha cyakurikiranwa nk’igishingiye ku rwango.

Polisi yavuze ko uwo wakoze ubwo bugizi bwa nabi yitwa Anderson Lee Aldrich, akaba kugeza ubu mu maboko ya Polisi aho ari no kuvurwa ibikomere.

Prezida Joe Biden yavuze ko abakundana bahuje igitsina bamaze imyaka bangwa urwango rurenze urugero.