Malawi: Visi Perezida yatawe muri yombi aregwa ruswa

Ibiro bya Malawi bishinzwe kurwanya ruswa ACB, ku wa gatanu byatangaje ko Visi Perezida Saulos Klaus Chilima, yatawe muri yombi bitewe na ruswa imuvugwaho.

Chilima azagezwa imbere y’urukiko, aho azakurikiranwa ku byaha bitatu ashuinjwa  birimo imigenzereze ijyanye na ruswa nk’umukozi wa Leta, nk’uko bikubiye mu itangazo ry’ibiro bishinzwe kurwanya ruswa.

Iri tangazo rivuga ko Visi Perezida Dr. Saulos Klaus Chilima bivugwa ko hagati y’ukwezi kwa Werurwe n’Ukwakira 2021, yakiriye indonke mu buryo bw’amafaranga angana na 280,000 by’amadorari y’Amerika n’ibindi bintu yahawe na Zuneth Sattar, nk’ishimwe. Uyu mugabo ariko ahakana ibyo aregwa.

Muri Kamena, Chilima yambuwe ubudahangarwa ubwo yatangiraga gukurikiranwa n’Urwego rushinzwe kurwanya ruswa.

Dr. Saulos Klaus Chilima w’imyaka 49 yagiye ku butegetsi mu 2020, nyuma yo kwiyamamazanya na Perezida Lazarus Chakwera.