Bwa mbere Bruce Melodie yerekanye umufasha we

Umuhanzi Itahiwacu Bruce Melodie yasangije abamukurikira ku mbuga ze nkoranyambaga ifoto ari kumwe n’umugore we bamaze kubyarana abana babiri.

Bruce Melodie ifoto yashyize ku mbuga nkoranyambaga yayiherekeresheje amagambo agaragaza ko bazabana kugeza mu busaza bwe.

Yagize ati: “Birampagije kwizera ko ubu jye nawe turiho. Uwantwaye ubusore mugabiye n’ubusaza”

Ni ifoto yahise ikurura amarangamutima ya benshi, bamwereka ko bishimiye kuba aberetse umufasha we, ndetse bamwe banamwizeza ko umunsi azatangaza ubukwe bwabo bombi biteguye kubashyigikira.

Ibi abigarutseho nyuma y’imyaka myinshi uyu muhanzi adakunda ko umugore we agaragara mu ruhame.

Yigeze kandi gukorera uyu mugore we indirimbo yise ‘Katerina’ iri no mu zamucururije bikomeye ndetse n’ubu iracyafite icyanga.

Bruce Melodie n’umugore we, Catherine, bashakanye mu 2015, ubu bafitanye abana 2 b’abakobwa. Urukundo akunda umuryango we, akawukumbura cyane iyo ari hanze y’u Rwanda, rwatumye yishyiraho tatuwaje y’abakobwa be.