Leta ya Uganda yemeje ko ntabakiri kwandura Ebola

Muri Uganda, uturere twa Mubende na Kassanda twari tumaze amezi abiri muri guma mu rugo kubera icyorezo cya Ebola twakuwe mu kato.

Leta ya Uganda, ku mugoroba wo ku wa gatandatu nibwo yavanye muri guma mu rugo utwo turere twari mu twagize ubwandu bwinshi bwa Ebola muri icyo gihugu.

Visi prezida wa Uganda, Jessica Alupo, yatangaje iby’uwo mwanzuro asobanura ko nta bwandu bushya, kandi muri utwo turere nta n’abakiri mu bitaro bashyizwe mu kato kubera icyo cyorezo. Yemeje ko Ebola isa nk’iyahashyijwe. Madamu Jessica gusa yatangaje ko Leta ikiri maso mu gihe cyose icyo cyorezo cyakongera kubura umutwe.

Ishami rya loni ryita ku buzima, OMS, rivuga ko kugirango byemezwe ko icyorezo cyaranduranywe n’imizi yacyo, mu gihe hazaba hashize iminsi 42 yikurikiranya nta muntu mushya wanduye. Umurwayi wa nyuma wa Ebola, Uganda yatangaje ko yavuye mu bitaro tariki 30 Ugushyingo.

Ebola yadutse muri Uganda mu mpera za Nzeri uyu mwaka yari iyo mu bwoko bwo muri Sudani, itarabasha kubonerwa urukingo ruyirwanya. Kuva muri uko kwezi, imaze guhitana abagera kuri 56, naho abayanduye bamaze kumenyekana ni 142 barimo n’abo mu murwa mukuru, Kampala.