Rwanda FDA yahagaritse imiti bivugwa ko yongera igitsina

Ikigo gishinzwe kugenzura Ibiribwa n’Imiti mu Rwanda, Rwanda FDA, cyahagaritse imiti y’ibimera itujuje ubuziranenge bivugwa ko yongerera ubunini imyanya ndangagitsina y’abagabo.

Nk’uko bikubiye mu itangazo ryashyizweho umukono ku wa 30 Ugushyingo 2022 n’Umuyobozi Mukuru w’iki kigo, Emile Bienvenue, Rwanda FDA itangaza ko iki cyemezo cyafashwe nyuma y’ubugenzuzi bwakorewe mu makampani akora ndetse akanacuruza imiti y’ibimera.

Iyo miti harimo uwitwa “Dawa ya Kupanua Uume” bivugwa ko ukoreshwa mu kongera ubugabo. Hahagaritswe kandi uwitwa ‘Delay Spray for Men’ urimo Vitamin E na wo ukoreshwa mu kongera ingano y’ibitsina by’abagabo.

Harimo kandi imiti ikorwa na sosiyete ya NGETWA, yitwa “Ngetwa 3” ifite garama 130 bivugwa ko ikoreshwa mu kuvura indwara zitandukanye.

FDA ivuga ko: “Usibye kuba itujuje ubuziranenge, iyi miti igira ingaruka mbi ku bantu bayikoresheje. Ni muri urwo rwego ibikorwa byo kwamamaza iyo miti na byo bihagarikwa”.

Rwanda FDA yasabye abatunganya, abatumiza, abaranguza ndetse n’abadandaza n’abacuruza imiti ikomoka ku bimera yavuzwe guhagarika kuyicuruza ndetse bagasubiza iyo basigaranye aho bayikuye.

Iki kigo kandi cyadabye abaranguza imiti yahagaritswe kwakira no kwandika iyo bazagarurirwa ndetse no gutanga raporo muri Rwanda FDA mu minsi itanu y’akazi, ikubiyemo ingano ya buri muti nyuma yo kwakira iyo bagaruriwe.

Yibukije kandi abatunganya, abaranguza n’abacuruza imiti ikomoka ku bimera gusaba ibyangombwa muri Rwanda FDA hamwe no kwandikisha imiti yabo nk’uko amabwiriza abiteganya mbere yo kuyicuruza.

Rwanda FDA yasabye abaturage bakoresha imiti y’ibimera yavuzwe muri iri tangazo by’ibimera guhagarika kuyikoresha kuko byagira ingaruka mbi ku mubiri.

Iri tangazo kandi ryasojwe hibutswa abatunganya, abaranguza n’abacuruza imiti ikomoka ku bimera gusaba ibyangombwa muri Rwanda FDA hamwe no kwandikisha imiti yabo nk’uko amabwiriza abiteganya mbere yo kuyicuruza.