Sudani y’Epfo: Abanyamakuru batandatu bafunzwe bazira videwo yerekana umukuru w’igihugu yihindanyije

Abanyamakuru batandatu muri Sudani y’Epfo batawe muri yombi bazira ko bakwirakwije amashusho agaragaza Perezida Salva Kiir yinyariye, nk’uko bivugwa n’amashyirahamwe aharanira uburenganzira bw’abanyamakuru.

Mu kwezi k’Ukuboza umwaka ushize, nibwo hari amashusho yahanahanwe ku mbuga nkoranyambaga agaragaza Perezida Kiir yihindanyije ubwo indirimbo yubahiriza igihugu yariho iririmbwa.

Abanyamakuru batandatu ba radiyo y’igihugu batawe muri yombi muri iki cyumweru nk’uko BBC ibitangaza.

Ishyirahamwe Comité pour la Protection des Journalistes/Committee to Protect Journalists (CPJ) ririmo rirasaba ko aba banyamakuru barekurwa.

Patrick Oyet, umuyobozi w’ishyirahamwe ry’abanyamakuru bo muri Sudani y’Epfo, yabwiye ibiro ntaramakuru by’Abongereza Reuters ko aba banyamakuru bikekwa ko bazi uburyo ayo mashusho y’umukuru w’igihugu yinyariye yagiye hanze.

Radiyo y’Igihugu ya Sudani y’Epfo, South Sudan Broadcasting Corporation, ivuga ko itigeze itangaza ayo mashusho.

Muthoki Mumo ahagarariye CPJ mu karere ka Afurika yo musi y’Ubutayu bwa Sahara asaba ko abo banyamakuru barekurwa nta kindi gisabwe, akavuga ko itabwa muri yombi ryabo ryerekana uburyo abashinzwe umutekano bihutira gufunga abanyamakuru igihe cyose abayobozi babonye amakuru atabanejeje.

Minisitiri w’itangazamakuru muri Sudani y’Epfo, Michael Makuei, yabwiye Radio Ijwi rya Amerika ko abaturage bakwiye gutegereza bakamenya impamvu aba banyamakuru bafunzwe.

Amashyirahamwe aharanira uburenganzira bwa muntu akomeje gusaba abayobozi ba Sudani y’Epfo guhagarika itoteza n’iterabwoba ku banyamakuru.

Perezida Kiir yabaye umukuru w’igihugu wa mbere wa Sudani y’Epfo igihugu gishya cya Afurika mu 2011. Ariko kuva icyo gihe, icyo gihugu cyakomeje kugenda gihura n’ibibazo byinshi birmo amacakubiri n’imidugararo ya politiki, ibiza ndetse n’inzara.