Minisitiri Biruta yaganiriye n’abahagarariye ibihugu byabo mu Rwanda

Minisitiri w’Ububanyi n’Amahanga w’u Rwanda, Dr Vincent Biruta, yagiranye ibiganiro n’Abadipolomate bahagarariye ibihugu byabo, ndetse n’abahagarariye imiryango mpuzamahanga mu Rwanda.

Minisiteri y’Ububanyi n’Amahanga mu Rwanda yatangaje ko ku wa 20 Mutarama 2023, Dr Biruta yakiriye aba bayobozi bahagarariye ibihugu byabo, kugira ngo baganire ku bufatanye hagati y’impande zombi, ibibazo by’Akarere no ku rwego mpuzamahanga.

U Rwanda rufite ubufatanye n’umubano mwiza n’ibindi bihugu, haba ku mugabane w’Afurika ndetse no ku yindi migabane.

Minisiteri y’ububanyi n’amahanga y’u Rwanda yateguye kugirana Inama n’abahagarariye ibihugu byabo, nyuma y’uko Guverinoma y’u Rwanda yatangaje ko ibabajwe no kuba Guverinoma ya Repubulika Iharanira Demokarasi ya Congo (RDC) yarahisemo kwikura mu biganiro by’i Luanda bigamije kugarura umwuka mwiza hagati yayo n’u Rwanda, ikaba irimo kugaragaza iterabwoba ryo kurugabaho ibitero.

Guverinoma ya RDC irashinjwa kuba yirengagiza gushyira mu bikorwa amasezerano y’i Nairobi n’ay’i Luanda yashyizeho umukono kandi ikaba n’uruhande rukomeye mu kuyashyira mu bikorwa.

Uretse RDC, yanze gukemura ikibazo cy’umutekano mucye mu burasirazuba bw’iki gihugu, no kubahiriza amasezerano ya Luanda na Nairobi, ibindi bigize umuryango wa Afurika y’Iburasirazuba bishyigikiye ko ikibazo cy’umutekano mucye urangwa muri RDC cyakemuka mu mahoro.

U Rwanda rusanga kuba RDC igerageza guhonyora ayo masezerano bishobora gusa kugaragara nk’amahitamo yayo yo gukomeza guhembera intambara n’umutekano muke, bityo rugashimangira ko Akarere k’Ibiyaga Bigari kadashobora gukomeza kwihanganira kurebera gahunda z’amahoro zitsindwa.

U Rwanda rumaze igihe rusaba amahanga kubwira DRC ko ibibazo ifite ari ibyayo, ko nta gihugu ikwiriye kubyegekaho kandi ko igisubizo cy’umutekano mucye, kizava ku bayobozi b’icyo gihugu.