RDC: Imirwano ikomeye yubuye hagati ya M23 na FARDC

Imirwano ikomeye yubuye mu gitondo cyo kuri uyu wa kabiri mu gace kari hafi y’umujyi wa Kitchanga hagati y’umutwe w’inyeshyamba za M23 n’ingabo za leta ya Repubulika ya Demokarasi ya Congo, FARDC.

BBC ivuga ko amakuru aturuka mu mujyi wa Rutshuru ugenzurwa na M23 muri Kivu ya ruguru avuga ko abaturage barimo guhunga iyi mirwano yumvikanamo imbunda ziremereye mu gace ka Kitchanga.

Lawrence Kanyuka, umuvugizi w’umutwe wa M23, yatangaje ko ingabo za leta “n’abacancuro bazo” bateye ibirindiro byabo muri Bwiza, Kitchanga ndetse no hafi yaho. 

Ingabo za leta zirahakana kurwana zifatanyije n’abacancuro kandi leta ishinja umutwe wa M23 kwanga gushyira mu bikorwa amasezerano y’amahoro ya Luanda ategeka izo nyeshyamba gusubira inyuma zikarekura ibice zafashe. Ingabo za leta kandi zishinja M23 ko ariyo igaba ibitero ku birindiro byazo.  

Umujyi wa Kitchanga muri Rutshuru usanzwe igice kimwe cyawo kigenzurwa na M23 naho ikindi kiri ku ruhande rwa leta. 

Mu itangazo rya M23 ryo kuwa mbere, uyu mutwe ushinja ingabo za leta gukomeza gutera ibirindiro byabo mu gihe M23 irimo kwitegura kurekura utundi duce igenzura mu kubahiriza amasezerano ya Luanda.  

Uruhande rwa leta ruvuga ko M23 itava mu bice ivuga ko yarekuye ahubwo ikomeza kuzenguruka hafi aho no kwimurira abarwanyi bayo ahandi. 

M23 ikomeje gushinja ubutegetsi bwa Kinshasa kudashaka gukemura mu mahoro aya makimbirane ahubwo ikiyiraje inshinga ari ugusenya uyu mutwe.

Itangazo ryayo rivuga ko M23 ifite uburenganzira bwo kwirwanaho kandi kubw’iyo mpamvu nta yandi mahitamo ifite uretse guhagarikira ibyo bitero aho bituruka.