Sudani y’Epfo: Papa Fransisko yasabye abenegihugu kwirinda urwango

Umushumba wa Kiliziya Gatorika, Papa Fransisiko yahamagariye abanyasudani kwirinda icyo yise ubumara bw’urwango bityo bakazabasha kugera ku mahoro n’ubusugire bavukijwe mu myaka y’ubushyamirane bw’amoko, yatembesheje imivu y’amaraso.

Mu gikorwa cye cya nyuma mbere yo gufata indege imusubiza i Vatikani, Papa Fransisiko yasomeye misa ahitiriwe intwari yabohoje Sudani y’Epfo, John Garang, witabaye Imana mu mwaka wa 2005. Vatikani yavuze ko iyo misa yitabiriwe n’abantu 100,000.

Papa w’imyaka 86 y’amavuko, mu butumwa bwe, yibanze ku bwiyunge no kubabarira.

Mu gusoza igitambo cya misa, mw’ijambo rye asezera mbere gato yo kwerekeza ku kibuga cy’indege, Papa Fransisiko yashimiye abaturage ba Sudani urugwiro bamugaragarije.

Yababwiye ati: “Bavandimwe bakundwa, nsubiye i Roma, ndushijeho kubagira hafi ku mutima, ntimuzigere mutakaza icyizere. Kandi ntimuzacikwe n’amahirwe yo kwubaka amahoro, mahoro n’umutekano bibe muri mwe. Amahoro n’umutekano, bibe muri Sudani y’epfo”.