Somaliya: Loni ikeneye miliyari 2.6 z’Amadolari yo gufasha abazahajwe n’inzara

Umuryango w’abibumbye, ONU watangaje ko ukeneye inkunga ya miliyari 2.6 z’amadolari muri uyu mwaka, yo gufasha abaturage ba Somaliya bagera kuri miliyoni 7.6 bazahajwe n’inzara.

Loni ivuga ko aba baturage bugarijwe n’inzara n’amapfa byatewe n’intambara, izamuka ry’ibiciro by’ibiribwa hamwe ndetse n’izuba ryacanye ari ryinshi.

Adam Abdelmoula ahagarariye ishami rya Loni rishinzwe imfashanyo yavuze ko kuva mu Mata kugera muri Kamena iki gihugu gishobora kuzibasirwa n’amapfa mu gihe imvura itagwa.

Somaliya cyo kimwe n’ibindi bihugu byo mw’ihembe rya Afrika bizahajwe n’izuba ryinshi nyuma y’imyaka itanu yikurikiranya nta mvura igwa.

Abdelmoula yavuze ko abantu bagera kuri miliyoni 6.4 bazahajwe n’inzara kandi iyo mibare ishobora kuziyongera ikaba yagera kuri miliyoni 8.3 hagati ya Mata na Kamena uyu mwaka.

Loni ivuga ko ibice by’igihugu bikeneye imfashanyo kurusha ibindi ari akarere ka Baidoa na Burhakaba ndetse n’abavanywe mu byabo no mu murwa mukuru Mogadishu.