Micomyiza woherejwe na Sweden, urukiko rwatesheje agaciro igihano yahawe n’inkiko Gacaca

Urugereko rwihariye rushinzwe kuburanisha ibyaha mpuzamahanga rukorera i Nyanza mu majyepfo y’u Rwanda rwatesheje agaciro ibyemezo by’inkiko Gacaca zari zarakatiye Bwana Micomyiza Jean Paul igifungo cya burundu zimuhamije ibyaha bya jenoside.

Inteko iburanisha yasomye iki cyemezo ari ubushinjacyaha ndetse na Jean Paul Micomyiza n’umwunganizi we badahari.

Mu 2008 na 2009 nibwo Micomyiza yari yakatiwe n’ikiko gacaca igihano cyo gufungwa burundu, ariko ubwunganiz bwe busaba ko cyagombaga kubanza guteshwa agaciro n’urukiko mbere y’uko urubanza rwe rutangira mu mizi.

Inkiko gacaca zo mu mirenge ya Cyarwa-Sumo na Ngoma mu Karere ka Huye zari zakatiye Micomyiza Jean Paul gufungwa ubuzima bwe bwose zimuhamije ibyaha bya jenoside. Ni imanza zaciwe uregwa adahari kuko yabaga mu gihugu cya Sweden.

Micomyiza ndetse n’umwunganizi we bari basabye urukiko ko icyo gihano yari yahawe n’inkiko gacaca cyabanza guteshwa agaciro mbere y’uko urubanza rwe rutangira kuburanishwa mu mizi.

Mu iburanisha riherutse kandi Micomyiza n’umwunganira bari basabye ko habaho iburanisha ryibanze kugira ngo hakurweho inzitizi zose zishobora kubangamira urubanza ariko urukiko rubabwira ko bitari ngombwa.

Mu mwaka ushize wa 2022 nibwo igihugu cya Swede cyohereje mu Rwanda Bwana Micomyiza kugira ngo akurikiranwe ku byaha bya jenoside.

Ubushinjacyaha bumurega ibyaha 3 birimo icyaha cya jenoside, icy’ubufatanyacyaha muri jenoside no gusambanya abagore nk’icyaha kibasiye inyoko muntu.

Micomyiza w’imyaka 51 yarezwe ubwicanyi bwibasiye abatutsi bwabereye mu bice bitandukanye byo mu mujyi wa Huye.

Nk’uko ubushinjacyaha bubivuga, imvugo z’abatangabuhamya zivuga ko Micomyiza yayoboye ubwicanyi bukabije bwabereye kuri bariyeri zari zashyizweho n’uregwa afatanyije n’interahamwe nawe akagira bariyeri yari ayoboye.

Ngo yabaga no mu cyiswe komite de crise yahigaga abatutsi. Urukiko rwavuze ko urubanza mu mizi ruzatangira tariki 28 z’ukwezi gutaha kwa 3.