Kenya: Abarenga miliyoni 5 bashobora kwibasirwa n’inzara

Muri Kenya, abaturage barenga miliyoni 5.4 bashobora kugeramirwa n’inzara kuva muri werurwe kandi abana bagera kuri miliyoni bashobora kugira ingaruka mbi zikomoka ku mirire muri uyu mwaka.

Ayo makuru yatangajwe n’umuryango usanzwe ukurikiranira hafi uko ikibazo cy’ibiribwa cyifashe ku isi avuga ko Abanya-Kenya miliyoni 4.4 bafite ikibazo cyo kubona ibyo kurya muri icyo gihugu gituwe n’abaturage miliyoni 47.5.

Imibare igaragaza ko iki kibazo kizarushaho kwiyongera ku kigero cya 43% ugereranije n’umwaka ushize.

Perezida wa Kenya William Ruto mu cyumweru gishize yateguye amasengesho yo gusabira igihugu ko cyabona imvura, ndetse atangaza ko leta ye igiye gushyiraho gahunda zizatuma Abanyakenya bose babasha kubona ibyo kurya.

Biteganijwe ko imvura ishobora kuzagwa muri Werurwe n’ubwo abahanga bakurikiranira hafi iby’ubumenyi bw’ikirere muri Kenya bo batangaza ko mu gice cy’amajyaruguru ya Kenya imvura izatinda kuboneka.

Icyo gice cy’igihugu cya Kenya cyamaze ibihe by’imvura bitandatu nta mvura iguye, ndetse n’igihe ibonekeye ikagwa ku rugero ruri hasi cyane.