Perezida Kagame yakiriye Minisitiri w’Intebe Wungirije w’ubwami bwa Jordanie

Perezida Paul Kagame ku mugoroba wo kuri uyu wa Gatatu tariki 22 Gashyantare 2023, yakiriye Minisitiri w’Intebe wungirije akaba na Minisitiri w’Ububanyi n’Amahanga w’ubwami bwa Jordanie, Dr Ayman Abdullah Al- Safadi n’itsinda rimuherekeje.

Dr Ayman Abdullah Al- Safadi yakiriwe na Perezida Kagame ari kumwe n’Umuyobozi w’Urwego rw’Ubutasi muri Jordanie, Gen Maj Ahmed Husni Hasan Hatoqia ndetse n’umugaba Mukuru w’ingabo za Jordan, Maj. Gen. Yousef Huneiti.

Ibiro by’Umukuru w’Igihugu dukesha iyi nkuru, byatangaje bagiranye ibiganiro byibanze ku kurushaho gushimangira ubufatanye mu nzego zitandukanye zirimo amasezerano yashyizweho umukono na ba Minisitiri b’ububanyi n’amahanga b’ibi bihugu mu bijyanye n’uburezi, Visa n’ibindi.

Kuri uyu wa gatatu tariki 22 Gashyantare 2023, nibwo u Rwanda na Jordanie byashyize umukono umukono ku masezerano y’ubufatanye mu nzego zitandukanye zirimo politiki, uburezi, ubucuruzi ndetse no kuvanaho visa ku badipolomate n’abandi bafite pasiporo za serivisi.

Minisitiri w’Intebe wungirije akaba na Minisitiri w’Ububanyi n’Amahanga w’Ubwami bwa Jordanie, Dr Ayman Abdullah Al- Safadi ari mu Rwanda mu ruzinduko rw’iminsi itatu kuva ku wa Kabiri tariki 21 Gashyantare 2023.

Akigera mu Rwanda yaboneyeho gusura Urwibutso rwa Jenoside yakorewe Abatutsi rwa Kigali.

Nyuma yo gutambagizwa ibice birugize, akanasobanurirwa amateka ya Jenoside yakorewe abatutsi mu 1994, Ayman Safadi yashimangiye ko Jenoside yakorewe Abatutsi yashyize igihugu hasi igatwara ubuzima bw’abasaga miliyoni ari ikimenyetso ndakuka cy’ibyo urwango, ivangura n’ubujiji bishobora kubyara.

Yashimye uburyo u Rwanda rwafashe ingamba zikomeye zo gukumira urwango n’amacakubiri rubungabunga amateka ya Jenoside yakorewe Abatutsi kugira ngo azabere isomo ibinyejana byinshi by’abazabaho ku Isi.