Mu Rwanda hari kubera inteko rusange ya FIFA

Kuva ku ya 13 kugeza ku ya 16 Werurwe mu Rwanda hari kubera Inteko rusange ya 73 y’impuzamashyirahamwe y’umupira w’amaguru ku isi, FIFA, izaberamo amatora y’Umuyobozi Mukuru w’iri shyirahamwe.

Iyi nteko rusange ya FIFA iteraniye mu murwa mukuru w’u Rwanda, Kigali, ahabereye inama ya Komite Nyobozi y’iri shyirahamwe muri 2018, ni naho hagiye kubera Inteko rusange ya 73. Ndetse ni narwo rwego rukuru mu birebana n’amategeko.

U Rwanda rwatoranyijwe kwakira iyi Nteko rusange bishingiye ku kuba ari igihugu gifite umutekano, hotel zo ku rwego mpuzamahanga, iterambere mu bijyanye n’itumanaho ku buryo abantu batazagira ikibazo mu gihe bari aho, ni uburyo bwiza bwo kugaragara ku igihugu.

Inteko rusange ya FIFA yitabirwa n’ibihugu 211 binyamuryango bya FIFA, buri gihugu kikaba gihagararirwa n’abantu 3. Iterana buri mwaka kuva mu 1998, mbere y’icyo gihe yateranaga rimwe mu myaka 2.

Muri iyi nteko ya 73 biteganijwe ko hazatorerwamo Perezida wa FIFA. Kugeza ubu Inteko rusange za FIFA zigera kuri 11 nizo zimaze gutorerwamo Perezida wa FIFA. 

Tariki ya 16 Ugushyingo 2022 yari itariki ya nyuma yo gutanga kandidatire z’abifuza kuyobora FIFA, yageze hari kanditatire imwe gusa ya Gianni Infantino w’imyaka 52 wifuza gukomeza kuyobora FIFA muri manda ya 3 y’imyaka 4.

Kuri uyu wa kabiri tariki 14 Werurwe hateganyijwe umuhango wo gushyikiriza Perezida wa Repubulika y’u Rwanda, Paul Kagame n’umwami wa Maroc, Mohammed VI igihembo cyagenewe abakuru b’ibihugu ba Afurika babaye indashyikirwa mu guteza imbere umupira w’amaguru mu mwaka wa 2022.

Ni igihembo cyitwa “CAF President’s Outstanding Achievement Award 2022”, gitegurwa n’Impuzamashyirahamwe y’umupira w’amaguru ku mugabane wa Afurika (CAF)

Mu bazitabira inteko rusange ya FIFA harimo abayobozi mu nzego z’umupira w’amaguru ku isi ndetse n’ibihangange byigeze guconga ruhago.