Perezida Kagame ari mu ruzinduko muri Qatar

Perezida Paul Kagame kuri uyu wa kabiri tariki 21 Werurwe, yageze i Doha muri Qatar mu ruzinduko rw’akazi.

Ibiro by’umukuru w’igihugu dukesha iyi nkuru, byatangaje ko biteganijwe ko Umukuru w’Igihugu aza kugirana ibiganiro n’Umuyobozi w’ikirenga w’icyo gihugu Sheikh Tamim bin Hamad Al Thani.

Ibiganiro by’abayobozi bombi bikaza kwibanda ku bufatanye hagati y’ibihugu byombi mu nzego zitandukanye.

Uru ruzinduko ruje rukurikira urwo Perezida Kagame aherutse kugirira muri icyo gihugu taliki ya 14 Gashyantare 2022, aho na bwo yaragiranye ibiganiro na Sheikh Tamim Bin Hamad.

Perezida Kagame ku Kibuga cy’Indege Mpuzamahanga cyitiriwe Hamad, yakiriwe n’Umuyobozi w’Ishami rishinzwe Potocole muri Minisiteri y’Ububanyi n’Amahanga Ibrahim bin Yousif Fakhro n’Ambasaderi w’u Rwanda muri Qatar Igor Marara.

Igihugu cya Qatar gisanzwe gifitanye umubano mwiza n’u Rwanda, ukaba ugaragarira mu bikorwa binyuranye, aho nk’urugero Qatar yashoye imari mu iyubakwa ry’ikibuga cy’indege cya Bugesera, ikaba ifitemo imigabane 60% naho Leta y’u Rwanda ikagiramo 40%.

U Rwanda na Qatar bisanzwe kandi bifitanye umubano mu bya gisirikare aho mu 2022, ibihugu byombi byashyize umukono ku masezerano y’ubufatanye mu bya gisirikare n’umutekano, nyuma y’uruzinduko rw’umugaba mukuru w’ingabo za Qatar, Lt. Gen. Salem Bin Hamad Al Aqeel Al Nabit yagiriaga mu Rwanda.