Niyonkuru Samuel ukinira ikipe y’Amagare ya Inovotec yegukanye isiganwa ry’amagare rya Kivu Belt Race 2023 ahigitse Muhoza Eric ukinira Bike Aid yo mu Budage.
Ni irushanwa ryabaye kuri iki Cyumweru tariki 26 Werurwe, ribera ku nkengero z’Ikiyaga cya Kivu mu Karere ka Rubavu. Ryateguwe ku bufatanye bw’Ishyirahamwe ry’Umukino w’Amagare mu Rwanda, FERWACY n’Akarere ka Rubavu.
Kivu Belt Race ni isiganwa ryongerewe mu azaba agize Shampiyona y’Amagare mu Rwanda mu 2023 mu rwego rwo kwegereza abaturage ibirori by’uyu mukino no kugaragaza ubwiza bw’Ikiyaga cya Kivu.
Iri rushanwa ryatangijwe n’abakinnyi bari munsi y’imyaka 16 mu rwego rwo gutegura Shampiyona y’Isi y’amagare izabera mu Rwanda mu 2025.
Nshutiraguma Kevin wa Cine Elmay Cycling Team yegukanye umwanya wa mbere mu cyiciro cy’ingimbi akoresheje isaha imwe n’iminota 47 n’amasegonda 42, mu gihe mu bangavu Byukusenge Mariatha yasize bagenzi be bakinana muri Bugesera amasegonda 33.
Mu bagore, Nirere Xaverine waherukaga gutwara Heroes Cycling Cup muri Mutarama, niwe wegukanye umwanya wa mbere akurikirwa na Mukashema Josiane na Mwamikazi Djazila.
Uguhatana gukomeye kwari gutegerejwe mu cyiciro cy’abagabo bakuru cyiganjemo abakinnyi b’abahanga kandi babigize umwuga harimo n’ikipe nshya ya Inovotec ya Areruya Joseph na Benediction Club ya Mugisha Moise na Manizabayo Eric.
Manizabayo Eric yakomeje kwigaragaza cyane ubwo bazengurukaga inshuro 5 za mbere nyuma Mugisha Moise aza kumufata bakomeza kujyana nubwo bitatinze kuko inyuma yabo hari igikundi cyari kimo Niyonkuru Samuel na Muhoza Eric.
Mugisha Moise yaje kugenda wenyine ariko Muhoza Eric na Niyonkuru Samuel bamufata ubwo hari hasigaye kuzenguruka inshuro imwe, maze ubwo bari begereye umurongo Niyonkuru Samuel yaje kwegukana isiganwa rya Mbere mu bakuru akurikirwa na Muhoza Eric naho Tuyizere Etienne asoza ari uwa gatatu.
Niyonkuru Samuel wegukanye Isiganwa Kivu Belt Race yakoresheje amasaha abiri, iminota 40 n’amasegonda 45.
Ishyirahamwe ry’Umukino w’Amagare mu Rwanda, rirateganya gukora andi masiganwa na yo azabera mu bice bitandukanye by’igihugu mu rwego rwo kwitegura Shampiyona y’Isi izabera mu Rwanda mu 2025.
Impanuka y’ikamyo bivugwa ko yabuze feri, ihitanye umupolisi w’igitsina gore n’umumotari wari umuhetse, abandi bagenzi 2 barakomereka. Iyo mpanuka yabereye mu Murenge wa Gisenyi, Akagari ka Nengo mu Karere ka Rubavu, hafi y’ibitaro bya Gisenyi, kuri iki Cyumweru tariki 26 Werurwe 2023, iyo kamyo ikaba yagonze n’ibindi binyabiziga. Amakuru yatangajwe n’umuvugizi wa Polisi mu Ntara y’Iburengerazuba, CIP Mucyo Rukundo, avuga ko icyateye iyi mpanuka ari ikamyo yavaga i Kigali yerekeza […]
Post comments (0)