Tunizia: Ibitaro byabuze ubushobozi bwo kwakira imirambo y’abimukira bagwa mu mazi

Inzego z’ubuzima muri Tuniziya zatangaje ko uburuhukiro bujyanwamo abitabye Imana mu mujyi wa Sfax butagifite ubushobozi bwo kwakira imirambo kubera imibare ikomeje kwiyongera y’abimukira bari kubura ubuzima barohamye mu mazi.

Abo bimukira bakomeje kuburira ubuzima mu mazi baba bari mu mato abajanye mu gihugu cy’u Butaliyani mu buryo bunyuranyije n’amategeko.

Sfax ni ko gace gafatwa nk’ingenzi ari naho abimukira buririra amato mu buryo bwa magendu.

Umuyobozi ushinzwe ubuzima ku rwego rw’intara yavuze ko ibyumba biruhukirizwamo abitabye Imana ku bitaro binini kurusha ibindi muri uwo mujyi ubu bimaze kubura ubushobozi bwo kwakira imirambo.

Mu byumweru bike bishize imibare y’abantu barimo n’imiryango bagerageza kwambuka amazi baturutse muri Tuniziya ikomeje kwiyongera cyane.

Mu cyumweru gishize cyonyine, abantu babarirwa muri za mirongo barohamye mu mazi ubwo ubwato barimo bwibiraga bagerageza kwambuka ngo bajye mu Butaliyani.