Kenya: Odinga yemeye guhagarika imyigaragambyo

Raila Odinga atavuga rumwe n’ubutegetsi muri Kenya, ku cyumweru yavuze ko ahagaritse imyigaragambyo yamagana ubutegetsi ndetse ko yiteguye kuganira na Perezida William Ruto. Ni mugihe kuri uyu wa mbere hari hategerejwe indi myigaragambyo ikomeye.

Odinga n’ubwo yavuze ko ahamagarira abigaragambya guhagarika imyigaragambyo, yatangaje ko ishobora gukomeza mu minsi mikie.

Abantu babarirwa mu bihumbi mu byumweru bibiri bishize bitabiriye imyigaragambyo yamagana ubuzima bukomeje guhenda no kuba yaribwe amatora. Muri iyi myigaragambyo habayemo ibikorwa by’ubugizi bwa nabi.

Mu gitondo cyo ku cyumweru, Perezida Ruto yasabye Odinga guhagarika iyo myigaragambyo avuga ko imaze kugwamo abantu batatu abandi barenga 400 barakomereka, barimo abashinzwe umutekano bagera kuri 60.

Ruto yavuze ko hashobora kuba impinduka muri komisiyo y’amatora, ibintu kandi bisabwa n’abatavuga rumwe n’ubutegetsi.

Odinga yabwiye abanyamakuru ko afite icyizere ku byatangajwe na Perezida Ruto. Abatavuga rumwe n’ubutegetsi basaba ko haba impinduka muri komisiyo y’amatora, harimo ko Perezida atemerewe kuyuzuzamo abamushyigikiye.

Odinga yavuze ko hakwiye kujyaho inteko ishinagamategeko iyobowe n’impande zombi. Yakomeje yemeza ko niba Perezida Ruto atabishakiye igisubizo bazahita basubira mu myigaragambyo.