Perezida Kagame yakiriwe na Col Mamady Doumbouya wa Guinée Conakry

Perezida Paul Kagame ku mugoroba wo ku wa Mbere, tariki ya 17 Mata 2023, yatangiye uruzinduko rw’akazi muri Guinée Conakry yakirwa na Perezida w’Inzibacyuho w’iki gihugu, Colonel Mamadi Doumbouya.

Umukuru w’Igihugu yageze mu Mujyi wa Conakry muri Guinée avuye muri Guinée-Bissau ndetse uruzinduko ari kugirira mu bihugu byo mu Burengerazuba bwa Afurika yarutangiriye muri Bénin kuva ku ya 15-16 Mata 2023.

Ibiro by’Umukuru w’Igihugu, Village Urugwiro, dukesha iyi nkuru byatangaje ko akigera muri Guinée yakiriwe na Colonel Mamadi Doumbouya.

Uruzinduko rwa Perezida Kagame muri Guinée rugamije gushimangira umubano usanzwe hagati y’ibihugu byombi ndetse n’ubushake bwabyo mu kurushaho gukorana mu nzego zirimo iz’ubukungu, umutekano, ubuhinzi, ubucukuzi bw’amabuye y’agaciro n’umuco.

Abakuru b’ibihugu byombi bagiranye ibiganiro byihariye byibanze ku ngingo z’umubano uhuriweho no kurushaho kuwushimangira.

Biteganyijwe ko kuri uyu wa Kabiri tariki 18 Mata 2023, u Rwanda na Guinea-Conakry bisinyana amasezerano y’ubufatanye mu nzego zitandukanye.

Colonel Mamadi Doumbouya ayoboye iki gihugu mu buryo bw’inzibacyuho aho yagiye ku butegetsi ahiritse Alpha Condé wayoboye Guinée kuva mu 2010 kugera mu 2021. Biteganyijwe ko iyi nzibacyuho izarangira mu 2024.

Perezida Kagame agendereye Guinée Conakry nyuma y’uko mu Ukwakira 2022, yakiriye mu biro bye, Minisitiri w’Ikoranabuhanga w’iki gihugu, Ousmane Gaoual Diallo, wamushyikirije ubutumwa bwa Perezida Col Mamadi Doumbouya.

Yaherukaga gusura iki gihugu muri Mata 2017 ubwo yari yitabiriye Inama y’Umuryango wa Afurika Yunze Ubumwe, AU.

Mbere yari yasuye iki gihugu muri Werurwe 2016. Icyo gihe yakiriwe mu buryo budasanzwe i Conakry, abaturage bamuha ikaze ndetse hari aho na we yagaragaye agenda n’amaguru abasuhuza.