Perezida Kagame yatangiye uruzinduko rw’akazi muri Tanzania

Perezida Paul Kagame yageze muri Tanzania, aho yatangiye uruzinduko rw’akazi rw’iminsi ibiri rugamije gushimangira umubano usanzwe hagati y’ibihugu byombi.

Umukuru w’Igihugu yageze i Dar es Salaam mu masaha ya mbere ya saa sita kuri uyu wa Kane, avuye muri Zimbabwe aho yari yitabiriye inama ya Transform Africa yiga ku Iterambere ry’Ikoranabuhanga muri Afurika.

Akigera muri Tanzania, Perezida Kagame yakiriwe na Minisitiri w’Ububanyi n’Amahanga, Stergomena Lawrence Tax.

Muri uru ruzinduko, byitezwe ko Umukuru w’Igihugu yakirwa na mugenzi we Samia Suluhu Hassan, bagirane ibiganiro mu muhezo, biza gukurikirwa n’ibyo bagirana hari n’intumwa z’ibihugu byombi.

Abakuru b’ibihugu byombi byitezwe kandi ko banaganira n’itangazamakuru.

Perezida Kagame agiriye uruzinduko muri Tanzania, nyuma y’uko muri Kanama 2021 mugenzi we Samia Suluhu na we yari yagiriye uruzinduko mu Rwanda.

Muri uru ruzinduko hasinywe amasezerano atanu arimo ay’ubufatanye mu ikoranabuhanga n’itumanaho. Ibihugu byombi byanasinyanye ay’ubufatanye mu bijyanye n’urujya n’uruza rw’abantu n’ibintu, uburezi n’amabwiriza agenga ibijyanye n’imiti.

U Rwanda na Tanzania bisanzwe bifatanya mu bikorwa byiganjemo ubucuruzi cyane ko uretse kuba Abanyarwanda bakoresha icyambu cya Dar es Salaam, hari n’ibicuruzwa biva mu Rwanda bijyanwa gucuruzwa muri Tanzania.